27.01.2023

Нам улууһугар Олоҥхо дьыктаана ыытылынна

 

РФ Бэрэсидьиэнэ В.В. Путин Ыйааҕынан биллэриллибит РФ норуоттарын култуурунай нэһилиэстибэлэрин Сылын чэрчитинэн, Саха АССР төрүттэммитэ 100 сылынан, Олоҥхо национальнай күнүгэр аналлаах Өрөспүүбүлүкэтээҕи Декада чэрчитинэн ийэ тыл барҕа баайын иҥэриммит олоҥхо тылын-өһүн таба суруйар үөрүйэҕи олохсутар-иҥэрэр сыаллаах «Олоҥхо дьыктаана» аахсыйа сэтинньи 21-26 күннэригэр ыытылынна.

Аахсыйаҕа сааһыттан, идэтиттэн уонна үөрэҕиттэн  тутулуга суох баҕалаах барыта кытынна. Дьыктаан тиэкиһин М.К. Аммосов аатынан ХИФУ Олоҥхону научнай-чинчийэр института Платон Алексеевич Ойуунускай «Дьулуруйар Ньургун Боотур» олоҥхоттон быһа тардыыны бэлэмнээбит. Өрөспүүбүлүкэ улуустарын библиотекалара   аахсыйаҕа көхтөөхтүк кытыннылар, сүрүн тэрийээччилэринэн буоллулар.  Уопсайа 300-кэ библиотека 5 тыһыынчаттан тахса киһини хабан кытыннардылар. 

Нам улууһугар 16 библиотека «Олоҥхо дьыктаана» аахсыйаны тэрийдилэр. Бу сыллата ыытыллар дириҥ суолталаах тэрээһиҥҥэ 245 киһи кыттыыны ылла. «Туйгун“  сыанаҕа 62 кыттааччы суруйан, „Олоҥхо дьыктаанын туйгуна“ диэн анал дипломунан наҕараадаланнылар.

Аан дойду култууратын шедеврынан ааттаммыт саха норуотун тылынан уус уран айымньытын үрдүкү чыпчаала – олоҥхобут сайда, аар-саарга аатыра турдун! Хас биирдиибит олоҥхону ааҕыаҕын, сахабыт тылын сүмэтин иҥэриниэҕиҥ!