Автор: Бэс ыйын 17 күнүгэр Нам улууһун киин библиотекатыгар кэрэ аҥардарга анаммыт ураты истиҥ, кэтэһиилээх көрсүһүү буолан ааста. Бу киэһэ ыалдьытынан киэҥник биллэр блогер, ис туругу бөҕөргөтүүгэ, олоҕу саҥалыы көрүүгэ элбэх киһиэхэ холобур буолбут Наталья Иванова буолла.
Саала лыык курдук толору кэрэ аҥардар муһуннулар. Көрсүһүү саҕаланыаҕыттан бүтүөр диэри дьон-сэргэ Натальяны сэргээн, интэриэһиргээн, биир тыынынан иһиттэ. Көрсүһүү сүрүн тиэмэтэ – «Ис турук уонна тас көрүҥ» – хас биирдии дьахтарга чугас буолан, кэпсэтии олус истиҥник, аһаҕастык ааста.
Наталья мустубут дьоҥҥо бэйэтин тус олоҕуттан, уопутуттан кэпсээтэ. Хайдах ис турук тас көрүҥҥэ дьайарын, санаа күүһүнэн олоҕу уларытыахха сөбүн, бэйэни хайдах таптыырга уонна сыаналыырга үөрэниэххэ сөбүн туһунан бэйэтин холобуругар олоҕуран сиһилии кэпсээтэ. Кини судургу тыла-өһө, аһаҕас кэпсэтиитэ хас биирдии киһи сүрэҕэр-быарыгар тиийдэ.
Көрсүһүү сүрүн үөрүүтэ – Наталья Иванова өр кэмҥэ бэйэтин уопутугар олоҕуран айбыт «Алгыстаах Алаас» бырайыагын сүрэхтэниитэ буолла. Бу бырайыак – ис эйгэни байытар, олоххо сырдык санааны саҕар, дьахтар кэрэтин арыйар ньымалары түмэр. Наталья бырайыак чэрчитинэн тахсыбыт үлэлэрин, оҥоһуктарын көрдөрдө, билиһиннэрдэ.
Кэпсэтии түмүгэр көрөөччүлэр санааларын үллэһиннилэр, элбэх ыйытыылары биэрдилэр, Натальяҕа истиҥ махталларын тиэртилэр. Көрсүһүүттэн хас биирдии дьахтар саҥа санаанан, сырдык эрэлинэн, күүһүнэн-уоҕунан толору таҕыста.
Нам улууһун киин библиотеката Наталья Ивановаҕа бу курдук дириҥ ис хоһоонноох, туһалаах киэһэни бэлэхтээбитин иһин улахан махталын тиэрдэр! Ону тэҥэ, бары кэлбит күндү көрөөччүлэрбитигэр көхтөөх кыттыыгыт, аһаҕас кэпсэтиигит иһин махтанабыт.
Бу курдук истиҥ көрсүһүүлэр өссө да элбии туруохтара!
Нам улууһун киин библиотеката.
