Автор: 
Хас биирдии көлүөнэ дьон уратылаах, кэннигэр хаалларар ыччаттардаах, дьон-сэргэ өйүгэр хаалар кэскиллээх, үлэлээх-хамнастаах буолар. Аҕа көлүөнэ үтүө ыралара сырдык сэбэрэлэрэ, ааттара-суоллара, үлэлэрэ умнуллубатын диэн кэриэстээн, кэскиллэрин түстээн «Нам оройуонун холкуостара (1927-1951 сс.)» диэн тахсыбыт дьоһун кинигэ сүрэхтэниитэ Н.М.Рыкунов аатынан киин библиотекаҕа алтынньы 8 күнүгэр буолла. Кинигэҕэ Нам оройуонугар холкуостар тэриллиилэрин, сайдыыларын историята сырдатыллар. Кинигэ тахсыытыгар бырайыак ааптара Нам улууһун кырдьаҕастарын сэбиэтин председателэ Софья Дмитриевна Кобякова, хомуйан бэчээккэ бэлэмнээбит Захар Саввин аатынан Үөдэй орто оскуолатын иһинэн үлэлиир “Ийэҕэ махтал” түмэлин салайааччыта Алексей Дмитриевич Яковлев кэлбит ыалдьыттарга кинигэ хайдах хомуллан бэчээттэммитин билиһиннэрдилэр. Үөрүүлээх тэрээһиммит ыалдьыттарынан буоллулар “Нам улууһа” МТ баһылыгын солбуйааччыта Юрий Вячеславович Дьяконов, ИЛ Түмэн тыа сиригэр уонна аграрнай бэлиитикэҕэ сис кэмитиэтин салайааччыта, депутат Александр Павлович Атласов, СӨ сэрии, тыыл, үлэ, быраабы харыстыыр тэрилтэлэр республикатааҕы ветераннарын сэбиэтин солбуйааччыта Никита Никитич Ноев, СӨ Тыатын хаһаайыстыбатын министерствотын иһинэн үлэлиир СӨ бааһынай хаһаайыстыбаларын уонна кооперативтарын ассоциациятын толорооччу директора Зарема Романовна Бочкарева, Нам түмсүү салайааччытын солбуйааччы Мария Николаевна Габышева, СӨ кинематографиятын ветераннарын общественнай түмсүүтүн председателэ Полина Николаевна Лепчикова уонна нэһилиэк баһылыктара, кинигэ тахсыытыгар көмөлөспүт, бэйэлэрин кылааттарын киллэрсибит кыраайы үөрэтээччилэр, бэтэрээн сэбиэттэрэ, активнай общественниктар. Кэлбит ыалдьыттар кинигэҕэ Нам улууһун 19 нэһилиэгин холкуостааһынын историята барыта түмүллэн киирбит дириҥ ис хоһоонноох кинигэ тула ирэ-хоро кэпсэтэн, санааларын атастастаһан эҕэрдэ тылларын анаатылар уонна кинигэ тахсыытыгар үлэлэспит дьоммутугар наҕараадалары, бэлэхтэри туттардылар. Ырыанан эҕэрдэлэрин тиэртилэр көрөөччүлэр биһирэбиллэрин ылбыт ырыаһыттарбыт Иннокентий Иванов, Дмитрий Барабанов, Петр Попов. Бу саҥа тахсыбыт кинигэбит эдэр көлүөнэҕэ уонна хас биирдии ааҕааччыга оройуон урукку тыйыс, аас-туор, кырыымчык кэмнэринээҕи олоҕун-дьаһаҕын, үлэтин-хамнаһын туһунан сиһилии билсэригэр олук ууруоҕа диэн бигэ эрэллээх кэлбит ыалдьыттарбыт кинигэни билсэн тарҕастылар.
