Автор: Татьяна Кондратьевна Ядрихинская аатынан Намнааҕы социальнай-геронтологическай киин олохтоохторугар анаан киин үлэһитэ ааҕар балаҕан тэриллэн үлэлиир. Ааҕар балаҕаҥҥа киин үлэһит Мария Васильевна Матвеева уонна Н.М.Рыкунов аатынан киин библиотека үлэһиттэрэ хас бэнидиэнньик аайы былааннаахтык саха сирин историятын, суруйааччыларын, биллэр-көстөр дьонун-сэргэтин, араас темаларга кэпсэтиилэри ыытабыт. Муус устар 21 күнүгэр поэт, прозаик, Саха народнай суруйааччыта, Аҕа дойду Улуу сэриитин кыттыылааҕа, учуутал, П.А.Ойуунускай аатынан СӨ Государственнай бириэмийэтин лауреата, СӨ культуратын үтүөлээх үлэһитэ, ССРС Суруйааччыларын союһун чилиэнэ, Россия суруйааччыта Василий Сергеевич Соловьев-Болот Боотур төрөөбүтэ 110 сылыгар аналлаах тэрээһин буолан ааста. Тэрээһиҥҥэ олохтоохтор суруйааччы олоҕун, айар үлэтин кытта билистилэр. Болот Боотур 1967 с. өрөспүүбүлүкэтээҕи литературнай күрэххэ маҥнайгы бириэмийэни ылбыт «Сааскы дьыбардар» диэн романын сүрүн геройдарын тула кэпсэтиигэ киин олохтооҕо Анатолий Константинович Охотин санаатын үллэһиннэ. Манна бэлиэтээн эттэххэ Анатолий Константинович библиотекаҕа сылдьан элбэҕи аахпыта ааҕар балаҕан тэрээһиннэригэр көхтөөхтүк кыттар. Буойун суруйааччы Васильев Сергей Степанович-Борогонскай хаан-уруу сиэнэ Поляков Владимир Викторович эһэтин билиһиннэрдэ. Болот Боотур олоххо, дьоҥҥо-сэргэҕэ, бэйэтин айымньыларыгар үтүө сыһыана мэлдьи биһиэхэ тыыннаах холобур буола туруохтун диэн бу кылгас тэрээһиммитин түмүктээтибит.
