Автор: Бүгүн бэс ыйын 18 күнүгэр Николай Рыкунов аатынан киин модельнай библиотекаҕа күндү киһибит, ытыктыыр коллегабытын, ветераммытын, СӨ культуратын туйгунун, Нам улууһун культуратын бочуоттаах үлэһитин, үлэ бэтэрээнин Валентин Петрович Черноградскайы олоҕун биир ураты кэрдииһигэр үктэммит кэминэн, өрөгөйдөөх үбүлүөйүнэн 75 сааһынан эҕэрдэлээтибит.
Валентин Петровичка үтүө санаабытын, сырдык ырабытын барытын ыытан туран библиотека кыргыттара сахалыы чаппараахтаах үҥкүүнэн эҕэрдэлээтибит, истиҥ-сылаас тыллар этилиннилэр.
Уус тарбахтаах, айылҕаттан талааннаах Валентин Петрович Черноградскай 1995 сыллаахха улуустааҕы библиотекаҕа художник-оформителинэн үлэҕэ киирэн «биһиги тапталлаах Петровичпыт» дэттэрэн үлэлээн кэлбитэ. Кини хас биирдии үлэлэрэ, үйэлээх оҥоһуктара, киэргэллэрэ дьон биһирэбилин ылан, күн бүгүн да өбүгэ ситимин быспакка үйэтитэ сылдьаллар.
Көтөрү өҥүнэн-түүтүнэн сыаналыыллар, киһини – онорбут дьыалатынан. Үлэ үтүө түмүктээҕэ, дьон махтала – куруук киһини үөрдэр, үрдүккэ кынаттыыр.
Бу күн Валентин Петровичка далааһыннаах үлэтин, дьонун-сэргэтин туһугар үлэлээбитин сыаналаан туран «За вклад в развитие Ленского наслега» бэлиэни Ленскэй нэһилиэк МТ биэрэн чиэстээтилэр.
Күндү убаастыыр бэтэрээн коллегабытын Валентин Петровиһы, өссө төгүл кэрэ-бэлиэ күҥҥүнэн итиитик-истиҥник эҕэрдэлиибит! Баҕарабыт өрүү чэгиэн-чэбдик доруобуйаны, уһун дьоллоох олоҕу!
