Автор: 
Алтынньы 28 күнүгэр П.Ойуунускай аат. литературнай музейга биир дойдулаахпыт, Россия Суруйааччыларын сойууһун чилиэнэ, литературнай критик Николай Рыкуновка аналлаах “Саха литературатын аныгы хараҕынан” диэн олус истиҥ ахтыы киэһэтэ буолла. Николайбыт биһиги ортобутугар баара буоллар быйыл 45 сааһын туолуо этэ… Ахтыы киэһэтигэр кыттыыны ыллылар саха народнай суруйааччылара Николай Лугинов, Елена Слепцова-Куорсуннаах, прозаик Ираида Попова, поэт, прозаик Анатолий Слепцов, эдэр суруйааччы Яна Байгожаева, тележурналист Евдокия Избекова уонна университетка үөрэппит преподавателлэрэ. Кинилэр Николай литератураҕа үлэтин, телевидениеҕа бэлэмнээбит биэриилэрин, музейга үлэлии сылдьан ыыппыт тэрээһиннэрин туһунан интириэһинэй ахтыылары оҥордулар. Төрөөбүт-үөскээбит Партизанын нэһилиэгиттэн Николай ийэтэ Екатерина Петровна Рыкунова, олоҕун доҕоро Екатерина Дмитриевна, нэһилиэк баһылыга Алексей Николаевич Зырянов, оскуолаҕа үөрэппит учууталлара кэлбиттэр. Ийэтэ Коля кыра эрдэҕиттэн кинигэни умсугуйан ааҕарын, сэмэйин туһунан кэпсээн туран, Николай доҕотторугар Рустам Каженкиҥҥа, Гаврил Андросовка маннык тэрээһиннэри тэрийэллэригэр, кини туһунан дьоҥҥо-сэргэҕэ кинигэ таһаарылларыгар долгуйан туран ис сүрэҕиттэн махтанан тыл эттэ. Оскуола директора Надежда Николаевна Аммосова биир дойдулаахтарын Николай Рыкунову үйэтитэн оскуола библиотекатыгар кини аата иҥэриллэрин туһунан үөрүүлээх сонуну иһитиннэрдэ. Николай убайа поэт Николай Михайлович Рыкунов Нам улууһугар тэрийбит «Отуу уота» литературнай түмсүүттэн түмсүү салайааччытын солбуйааччыта Прасковья Байанаева, эдэр суруйааччылар Оксана Васильева, Татьяна Михайлова, Күннэй Уран Саргын Кыыһа, Намнааҕы кииннэммит библиотечнай ситим директора Майя Романовна ахтыылары оҥордулар. Кэлбит ыалдьыттар Национальнай библиотека тэрийбит кинигэ быыстапкатын сэргии көрдүлэр. Талааннаах, кыахтаах өссө да элбэҕи айыахтаах-тутуохтаах , литература эйгэтигэр элбэҕи суруйохтаах-бичийиэхтээх уолбут эрдэ олохтон туораабыта олус хомолтолоох. Сахалыы куттаах Партизан нэһилиэгэ Николай Михайлович Рыкунов, Анна-Парникова-Сабарай Илгэ, Николай Рыкунов курдук киэҥник биллэр суруйааччылардааҕынан биллэр. Ити курдук Николай Рыкунов туһунан ахтыы киэһэтэ олус истиҥник, иһирэхтик буолан ааста. Нам улууһун ааҕааччыларын ааттарыттан Николайбыт сырдык аатын үйэтитэн, дириҥ ис хоһоонноох үлэни ыыталларыгар доҕотторугар Рустам Каженкиҥҥа, Гаврил Андросовка махталбытын тиэрдэбит.
