1922 сыллаахха Нам оройуонун Таастаах нэһилиэгэр төрөөбүтэ. 1937 сыллаахха Гаврил Гаврильевич 15 саастааҕар комсомолга киирэр. Ити сыл комсомол Саха уобаластааҕы комитетын иһинэн комсомольскай үлэһиттэри бэлэмниир курсу бүтэрэр. 1938-39 сылларга Нам оройуонугар ССКП райкомугар пропагандиһынан үлэлиир. Якутскай куоракка үөрэнэн, учуутал идэтин ылар. 1940-42 сылларга төрөөбүт нэһилиэгэр, Таастаахха, начальнай оскуолаҕа бастаан история учууталынан, онтон кэлин оскуола директорынан үлэлиир.
Гаврил Гаврильевич Таастаах оскуолатын бастакы директора этэ. Оскуола иһигэр кини кэлиэҕиттэн комсомольскай үлэ тигинии түспүтэ. Бэрт сэмэй, аламаҕай майгылаах буолан оҕолорго да, саастыылаахтарыгар да сөбүлэтэрэ. Иллэҥ кэмигэр скрипкаҕа, мандолинаҕа оонньуура, хоһоон суруйара.
Аҕа дойду сэриитигэр 1942 с. ыҥырыллыбыт, гвардейскай чаас сержанын быһыытынан элбэх кыргыһыыларга сылдьыбыта. Ол туһунан кини төрөппүттэригэр уонна колхоһун дьонугар подразделение командирыттан махтал сурук кэлбитэ. Ийэ дойдутун иһин геройдуу охсуһа сылдьан, 1943 с. алтынньыга сырдык тыынын толук уурбута. , көмүллүбүт сирэ биллибэт.
Төрөөбүт алааспар
Быраһаай, терөөбут алааһым,
Көнүлгэ күүлэйдиир кыраайым!
Мин бардым сидьиҥ фашиһы утары
Кыырыктаах охсуһуу уотугар.
Кыайыынан эргийэн кэлэрбин
Дьоллоохтук үөрүүнэн көрсүһээр
Күөх унаар сибэккиң сытынан
Сүрэҕим тымырын толороор.
Өстөөҕү, фашиһы кыдыйан
Эргийэн кэлэрбин кэтэһээр
Арыылаах алаайы аскынан
Үөрүүлээх остуолла тэрийээр.