Автор: Муус устар 27 күнэ – саха норуотугар быһаарыылаах уонна ураты суолталаах бэлиэ күн 1922 сыллаахха муус устар 22 күнүгэр – Саха Автономнай Советскай Социалистическай өрөспүүбүлүкэтэ төрүттэммитэ. Бу күн саха норуотун чулуу уолаттара Максим Аммосов, Былатыан Ойуунускай, Исидор Барахов уонна да атыттар Саха сирэ автономия буоларын ситиспиттэрэ. Ол саха омуга сайдыытыгар улахан төһүү күүс, бигэ тирэх буолбута.
1991 сыллаахха Саха сирин бастакы президиэнинэн Михаил Ефимович Николаев талыллар. Онтон 1992 сыллаахха, муус устар 27 күнүгэр Саха Өрөспүүбүлүкэтин Төрүт сокуона (Конституцията) ылыныллан, бу күн олоххо киирбитэ. Билигин муус устар 27 күнүн Өрөспүүбүлүкэ күнүн быһыытынан билинэбит. Саха Өрөспүүбүлүкэтин былааҕа көнө муннуктаах иэн буолар. Түөрт сытыары дьураа ойуулардаах: сырдык халлаан күөх – көҥүл буолууну, эрэли көрдөрөр; маҥан – тыйыс айылҕалааҕын көрдөрөр, кыһыл – төрөөбүт дойдуга эрэллээх уонна күүстээх буолууну, сайдыыны көрдөрөр уонна от күөх – кылгас күөх сайыны, доҕордоһууну бэлиэтиир. Маҥан төкүнүк – үрүҥ күнү көрдөрөр. Гиэрбэҕэ былыр Өлүөнэ очуос таастарыгар ойууламмыт аттаах киһи ойууланар. Үөһээ сэттэ алмаас таастар сэттэ омугу көрдөрөллөр: сахалар, нууччалар, эбээннэр, эбэҥкилэр, долганнар, юкагирдар, чукчалар.
Бугүҥҥү сүдү суолталаах күнүнэн эҕэрдэлиибит! Бары чэгиэн-чэбдик, бөҕе ис туруктаах сырдык санааннан салайтаран, үтүөҕэ-кэрэҕэ эрэ дьулуһуох! Николай Рыкунов төрөөбүтэ 90 сылыгар анаммыт “Халандаарга хара күн суох” бырайыак чэрчитинэн бүгүҥҥү бэлиэ күҥҥэ анаан бэйиэт хоһоонуттан быһа тардыыны ааҕар Егор Протопопов, Нам улууһа муниципальнай тэриллии баһылыгын солбуйааччыта.
Уруй буоллун барыгытар Саха Республикатын күнүнэн!
