Автор: Бүгүн, муус устар 29 күнүгэр Нам үлэһит дьонун, Энсиэли хочотун бурдуктаах буолактарын, нэлэмэн хочолорун, ача силик айылҕатын айымньыларыгар хомоҕойдук хоһуйбут биллиилээх поэт, суруналыыс, ССРС суруйааччыларын уонна журналистарын сойууһун чилиэнэ Николай Михайлович Рыкунов төрөөбүтэ 90 уонна кини сырдык аата улуустааҕы киин библиотекаҕа иҥэриллибитэ 30 сылларыгар аналлаах тэрээһин буолан ааста. Бу бэлиэ, үйэтитии күнүгэр улуус дьаһалтатын аатыттан баһылык солбуйааччыта Егор Протопопов, «Отуу уота” литературнай түмсүү салайааччыта Алексей Татаринов-Удьурҕай, Н.М.Рыкунов кыыһа Майя Рыкунова, Нам библиотекаларын кииннэммит ситимин директора Майя Софронова эҕэрдэ тылларын эттилэр.
Тэрээһин кыттыылаахтарыгар 30 сыл анараа өттүгэр тахсыбыт историческай докумуону, дьаһалы ааҕан билиһиннэрии уонна Николай Михайлович өйдөбүнньүк дуоскатыгар сибэкки дьөрбөтүн ууран ахтан-санаан аастыбыт.
Салгыы библиотекаҕа киирэн Николай Рыкуновка уонна кини тэрийбит «Отуу уота» литературнай түмсүүгэ аналлаах саҥа быыстапка – стендэ турбутун библиограф Раиса Гоголева билиһиннэрдэ. Краеведческай саалаҕа поэт олоҕун, айар үлэтин көрдөрөр “Ходуһа ырыаһыта” виртуальнай быыстапканы кыраайы үөрэтэр салаа сүрүннүүр библиотекара Раиса Дьяконова сиһилии кэпсээтэ.
Төгүрүк остуол тула олорон, быйылгы үбүлүөйдээх сылга былааннаммыт тэрээһиннэр, Н.М.Рыкунов аатын үйэтитиигэ эбии дьаһаллар тустарынан кэпсэтии тэрилиннэ. М.Р.Софронова 2026 сыл Нам библиотекаларын ситимигэр Н.М.Рыкунов сыла биллэриллэн, былааннаах торумнуур үлэлэр ыытылла туралларын, М.Н.Рыкунова аҕатын аатынан бириэмийэни сөргүтүүнү, А.М.Татаринов-Удьурҕай эһиил “Отуу уота” тэриллибитэ 60 сылын бэлиэтиир былаанын, “Туллук хаара” мелодистар түмсүүлэрин салайааччыта А.Т.Замятин “Ырыкыныап ырыата” диэн күрэҕи тэрийиини билиһиннэрдилэр.
Бу курдук ыраас халлааннаах сааскы сырдык күн улахан бэйиэт, суруналыыс, үтүө киһи Николай Рыкунов аата ааттанна, кэскилэ түстэннэ.
