29.03.2024

Библиотека күнэ -Хатырыкка

Ыам ыйын 26 күнүгэр Бүтүн Россиятааҕы библиотека күнүн көрсө  Намнааҕы библиотечнай ситим профкомун (председатель Семенова С.Н.)  көҕүлээһининэн  коллектив уонна библиотека ветераннара мустаммыт  Хатырыкка  библиотечнай пикникка сырыттыбыт.  Биир дойдулаахпыт,  уһулуччулаах государственнай уонна политическай деятель  М.К.Аммосов 120 сылынан сибээстээн  М.К.Аммосов аатынан Саха республикатын  государственноһын историятын музейыгар  экскурсия тэрилиннэ.  Улуус Ытык киһитэ, музейга уһун сылларга научнай сотруднигынан үлэлээбит  Попова М.Н. кэрэхсэбиллээх кэпсээнин сэргии иһиттибит, элбэх туһалааҕы, интэриэһинэйи биллибит. Экология сылынан музей  тиэргэнин киэргэтиигэ анаан  библиотека коллектива сайыҥҥы сибэккилэри бэлэх уунна.

Салгыы  “Үрдүк Иирэ” этнографическай комплекс тутууларын көрдүбүт, өйдөбүнньүк хаартыскаларга түстүбүт.  Айылҕаҕа тахсыбыт дьон быһыытынан, кэрэ көстүүлээх Өлүөнэ өрүс биэрэгэр  бырааһынньыктааҕы бэлиэ тэрээһиммит салҕанна. Директоры солбуйааччы Лукина З.И. биир идэлээхтэрин библиотека күнүнэн эҕэрдэлээн туран, специалистар ортолоругар ыытыллыбыт “Мин идэм” диэн эссе күрэҕин түмүгүн билиһиннэрдэ уонна кыайыылаахтарга дипломнары, бэлэхтэри туттарда.  Профком председателэ  Сардана Николаевна  библиотека ветераннарын эҕэрдэлээн, өйдөбүнньүк бэлэхтэри уунна.  Библиотекардар  М.К.Аммосов туһунан ырыа ыллаатылар, киниэхэ анаммыт хоһооннору доргуччу аахтылар. Маны таьынан сайын туһунан ырыаҕа күрэх,  араас ис хоһоонноох оонньуулар, күрэхтэр ыытылыннылар. Бу курдук быйылгы библиотека күнүн олус туһалаахтык, интэриэһинэйдик атаардыбыт,  сайыҥҥы айылҕа  көй салгынынан дуоһуйа тыынан, сынньанан тарҕастыбыт.  Коллектив профкомугар  итии истиҥ махталбытын тиэрдэбит.

Гоголева Р.А., методист

 

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять