Автор: 
Олунньу 17 күнүгэр Намнааҕы Н.М.Рыкунов аатынан киин библиотекаҕа “Төрөөбүт тыл, сурук-бичик” күнүн чэрчитинэн «Саха тыла- өркөн өйбүт» диэн үрдүкү кылаас үөрэнээччилэригэр хамаанданан үһүс төгүлүн ыытыллар интеллектуальнай күрэхпит буолан ааста. Быйылгы сылга илгэлээх саха тылбыт көһө сылдьар бэлиэлээх “Саха тыла-өркөн өйбүт» күрэҕэ үһүс төгүлүн ыытынна. Ол курдук 2024 сылга иккис нүөмэрдээх, 2025 сылга И. С. Гаврильев аат. маҥнайгы нүөмэрдээх Нам орто оскуолаларын хамаандалара кыайыы өрөгөйүн туппуттара. Күрэхпитигэр Гаврильев И.С.аат. Нам маҥнайгы нүөмэрдээх орто оскуолатын, сал. М.Н.Говорова, Охлопков Н.С. аат. улуустааҕы гимназия уонна гимназия интернатын, сал. Е.Н.Захарова, Артамонов В.П. аат. Хамаҕатта саха-французскай лиссиэйин, сал. Ю.Ю.Парникова, Винокуров И.Е. аат. Хатыҥ-Арыы орто оскуолатын, сал. М.Д.Новгородова үөрэнээччилэрэ кыттыыны ылан алта түһүмэхтээх күрэххэ ситиһиилээхтик кытыннылар. Тэрээһини “Күн оһуохайа” телевизионнай проект полуфиналиһа, Намнааҕы иккис нүөмэрдээх оскуола 10-с кылааһын үөрэнээччитэ, олоҥхо толорооччу Эвилья Шадрина «Ийэ тыллаах буоламмын» диэн ылбаҕай ырыатынан аста, сал. Вера Цыпандина-Куличкина. Үөрэнээччилэргэ ситиһиини баҕаран туран , эҕэрдэ тылын тиэртэ «Ийэ тыл кэскилэ» түмсүү, улуустааҕы “Отуу уота” литературнай түмсүү чилиэнэ, төрөөбүт тыл активиһа, “Күн” упсастыбаннай түмсүү Намнааҕы салаатын салайааччыта, Нам улууһун Үөрэҕин салалтатын иитэр үлэҕэ отделын сүрүннүүр специалиһа Оксана Егоровна Васильева. Илгэлээх саха тылбыт көһө сылдьар бэлиэтин үөрүүлээх быһыыга-майгыга эҕэрдэ тылын этэн туран, И. С. Гаврильев аат. маҥнайгы нүөмэрдээх Нам орто оскуолатын саха тылын уонна литературатын учуутала Говорова Марфа Николаевна туттарда. Тэрээһиммитигэр түһүлгэ ыалдьыта НВК «Саха» ханаал редактора, ыытааччыта Георгий Белоусов оҕолорго ыйытыыларын биэрдэ. Дьүүллүүр сүбэҕэ Уран Күннэй Саргын Кыыһа – Нам улууһун “Отуу уота” литературнай түмсүү чилиэнэ. Орлова Сахаяна Афанасьевна – “Нам улууһа” МТ культураҕа уонна духуобунай сайдыыга сүрүннүүр специалиһа, кыраайы үөрэтээччи, Аргунов Семен Андреевич — “Эҥсиэли” хаһыат редактора, Россия суруналыыстарын сойууһун чилиэнэ үлэлээтилэр.
Күрэх түмүгүнэн бастакы миэстэни И.Е.Винокуров аат. Хатыҥ-Арыы орто оскуолатын хамаандата, сал. М.Д.Новгородова ылан илгэлээх сахабыт тылын бэлиэтин тутан кыайыы үөрүүтүн биллилэр. Иккис миэстэҕэ тигистилэр В.П.Артамонов аат. Хамаҕатта саха-французскай лиссиэйин хамаандата, сал. . Ю.Ю.Парникова. Үһүс миэстэни ыллылар И. С. Гаврильев аат. маҥнайгы нүөмэрдээх Нам орто оскуолатын хамаандата, сал. М.Н.Говорова. Бары кыттыбыт оҕолорбутугар, дьоммутугар-сэргэбитигэр махталбытын тиэрдэбит. Инникитин күндү кэнчээри ыччаттарбытыгар баҕарабыт төрөөбүт дойдуга бэриниилээх буолууну, төрөөбүт тылгытын, суруккутун-бичиккитин толорутук туттар, өрө тутар, киэн туттар, киэҥ эйгэҕэ тарҕатар дьоһун дьон буолаарыҥ.
