Автор: 
Кулун тутар 19 күнүгэр Дьокуускай куоракка киэн туттар биир дойдулаахпыт, уһулуччулаах судаарыстыбаннай уонна бэлитиичискэй диэйэтэл Илья Егорович Винокуров төрөөбүтэ 130 сылынан үбүлүөйдээх тэрээһиннэр үрдүк таһымҥа ыытылыннылар. Бу күн Бырабыытылыстыба 1 №-дээх дьиэтин саалатыгар уопсастыбаннас үөрүүлээх мунньаҕа ыытылынна, киэһэ П.А.Ойуунускай аатынан Саха академическай тыйаатырыгар «Көҥүлгэ, сырдыкка дьулуһан, дьон-норуот туһугар охсуспут Ылдьааны махталлаах норуоппут мэлдьитин киэн туттан ааттыаҕа…” улахан ис хоһоонноох кэнсиэр буолла.
Дьоро күҥҥэ Н.М.Рыкунов аатынан киин библиотека кэлэктиибэ көхтөөх кыттыыны ылла. “Илья Егорович Винокуров үтүө аата норуотун сүрэҕэр мэлдьи тыыннаах!” диэн Винокуров И.Е. олоҕун, үлэтин сырдатар хас да түһүмэхтэртэн турар кинигэ быыстапкатын туруоран, дьон-сэргэ сэҥээрэн көрдө-иһиттэ. Бибилэтиэкэ сайтыгар оҥоһуллубут “Наследие Винокурова” электроннай ресурс, анимационнай киинэ быыстапка ис хоһоонун ситэрэн, байытан көрдөрүлүннүлэр. Маны тэҥэ, библиотека специалистара И.Е.Винокуровка аналлаах календары, оҕолорго анаммыт “Илья: путь героя” диэн комикс кинигэтин билиһиннэрдилэр, атыыга таһаардылар.
Р.Гоголева
