Автор: Ядрихинскай Прокопий Прокопьевич — Бэдьээлэ (28.03.1901—04.02.1979) — норуот ырыаһыта уонна олоҥхоһут, ССРС суруйааччыларын сойууһун чилиэнэ, Саха АССР култууратын үтүөлээх үдэһитэ, Нам улууһун ытык киһитэ.
1901 сыл кулун тутар 28 күнүгэр Нам улууһун Көбөкөн нэһилиэгэр төрөөбүт. Көбөкөн нэһилиэгэ өҥ буордаах, бурдук үчүгэйдик үүнэр сирдэрдээх буолан кураан сылларга өрүс уҥуортан иҥин элбэх киһи кэлэн барар эбит, олор истэригэр уос номоҕун билэр уус тыллаахтар эмиэ бааллара. Холобура, уонча саастааҕар Өксөкүлээх кэлэн хас да хонон ааспытын ахтара. Онон уол кыра эрдэҕиттэн олоҥхону истэн улааппыта.
Аҕата бэйэтин кыанар, үчүгэй охсооччу эбитэ үһү да, хараҕа суох буолан хаалан, ыарытыйан эрдэ өлбүтэ. Уол ийэтинээн Бүөтүр Потапов-Хараарбах диэн ырааҕынан аймахтарын илиитигэр киирбитэ. Ол Хараарбах уос номоҕун үрдүктүк тутара, куруук тойуксуттары, остуоруйаһыттары, олоҥхоһуттары мунньар буолара. Ол кэмҥэ уол бастакы «Баай-тойон» олоҥхотун долоҕойугар хатаан кэбиһэр. Уон алта сааһыттан олоҥхолуур буолбут. 1931 сылтан холхуостаах. Завхоз, кассир, биригэдьиир.1946—1948 сылларга бэрэссэдээтэл. Кэнники сылларга совхозка оробуочай. Кини олоҥхолоро 1938 сылтан бэчээттэнэр этилэр. «Күн Дьөһүөлдьүт» уонна «Дьырыбына Дьырылыатта» олоҥхолоро магнитофоҥҥа сурулланнар НВК «Саха» фондатыгар бааллар.
Эпическэй репертуарга П. П. Ядрихинскай-Бэдьээлэ саха олоҥхотун идейнэй ис хоһоонуттан ордук сыаналааҕын оннунан хаалларбыта. Саха эпоһыгар ордук үрдүк патриотическай матыыптарынан кыыс — бухатыыр туһунан олонхо цикла чорботуллар. Идея төрдө көстөрүнэн бухатыыр төрөөбүт дойдутун — Орто дойдуну көмүскээччи буолуохтаах. П. П. Ядрихинскай — Бэдьээлэ эпическэй нэһилиэстибэтэ билиҥҥи да кэмҥэ суолтатын сүтэрбэтэҕэ. Олоҥхо суруйуулара, олоҥхо тылларыттан оҥоһуллубут импровизация ырыалара суолталарын сүтэрбэтэхтэр уонна билигин кинилэр былыр уонна билиҥҥи эпическэй наследие туругун туһунан салгыы үөрэтэргэ биллэн турар кырдьыктаах, баай матырыйаалы чинчийээччилэргэ биэрэллэр. 1938 с. П. П. Ядрихинскай «Тараҕана сайылык» диэн ырыата хрестоматийнай айымньы буолбута.
1979 сыл олунньу 4 күнүгэр өлбүт.
Ядрихинскай Прокопий Прокопьевич — Бэдьээлэ айымньыларын уонна кини туһунан сиһилии ыйыллыбыт сигэнэн киирэн ааҕыҥ !
