Автор: Муус устар 3 күнүгэр, Чурапчы улууһа Нам оройуонуттан 41 киһилээх халыҥ дэлэгээссийэбитин үөрэ-көтө, бэрт сылаастык көрүстэ.
Көрсүһүү бөдөҥ судаарыстыбаннай уонна бэлитиическэй диэйэтэл Илья Егорович Винокуров төрөөбүтэ 130 сылыгар ананна. Кини Нам улууһугар эрэ буолбакка Чурапчы улууһугар, ону тэҥэ бүтүн саха дьонугар-сэргэтигэр улахан өҥөлөөх Саха саарына буолар.
Бу күн икки улуус дьаһалтатын бэрэстэбиитэллэрин, учуонайдары, учууталлары, бэтэрээннэри, оскуола оҕолорун уонна актыыбнай ыччаты тоҕус томтордоох Чурапчы сиригэр түмэн, тэтимнээх киэҥ бырагырааммалаах буолан ааста.
Дэлэгээссийэ аан маҥнай, Чурапчы гимназиятыгар төгүрүк остуолга кытынна. Тэрээһини Чурапчы улууһун баһылыгын социальнай боппуруостарга солбуйааччы Мария Кронникова салайда.
Киирии тылы улуус депутаттарын Сэбиэтин бэрэссэдээтэлэ Яков Оконешников эттэ. И. Е. Винокуров күүс өттүнэн хоту көһөрүллүбүт чурапчылары дойдуларыгар төннөллөрүн ситиспитин бэлиэтээтэ, «кини сырдык аатын үйэтитэр, ыччаттарбытыгар тиэрдэр ытык аналлаахпыт» – диэн тоһоҕолоон эттэ.
Нам улууһун делегациятын илдьэ кэлбит, баһылыгы социальнай боппуруостарга солбуйааччы Егор Протопопов сыал-сорук уонна туох үлэ-хамнас барыахтааҕын туһунан тыл эттэ уонна икки улуус салгыы бииргэ үлэлэһэр кэскилин торумнаата.
Салгыы Илья Винокуров төрөөбүт дойдутуттан Хатыҥ-Арыы нэһилиэгиттэн дакылааттаах таҕыстылар :
«И. Е. Винокуров нэһилиэстибэтин нэһилиэк таһымыгар харыстыыр үлэ туһунан» Хатыҥ-Арыы нэһилиэгин баһылыга Иван Ноговицын.
«Уһулуччулаах биир дойдулаахпыт олоҕун, үлэтин туһунан» И. Е. Винокуров аатынан историко-краеведческай музей салайааччыта Михаил Нестеров.
И. Е. Винокуров аатын сүгэр оскуола кини аатын үйэтитиигэ үгүс хайысхалаах үлэни ыытарын туһунан Хатыҥ-Арыы орто оскуолатын ОБиЗР учуутала Денис Сивцев кэпсээтэ.
Уонна Хатыҥ-Арты орто оскуолатыгар өр кэмҥэ дириэктэринэн үлэлээбит Дмитрий Ноговицын тахсан үөһэ дакылааттарга этиллибэккэ эбии И.Е. Винокуров туһунан эбэн-сабан, түмүктээн эттэ.
Ол кэннэ Наталья Стручкова, Нам бибилэтиэкэтин ааҕааччылары кытта алтыһар отдел сэбиэдиссэйэ, И. Е. Винокуровка аналлаах электроннай ресурсаны билиһиннэрдэ.
Бибилэтиэкэ ИИ нөҥүө оҥорбут мультигын көрдөрбүтүн мустубут дьон олус сэргээтилэр.
Чурапчы улууһун Бочуоттаах олохтооҕо, СӨ тыа хаһаайыстыбатын үтүөлээх үлэһитэ Иннокентий Аммосов улуус салалтатыгар үлэлиир кэмнэригэр Хоту көһөрүллүү кыттыылаахтарын үйэтитиигэ туох үлэни тэрийбитин туһунан кэпсээтэ. И. Е. Винокуров Чурапчы көһөрүүлээхтэригэр өҥөтүн уонна Чурапчылар киэн туттар биир дойдулаахтарын профессор Георгий Башарин сырдык аатын турууласпытын бэлиэтээтэ.
Намнар үйэтитиигэ үлэлэһэргитин сэргиибин диэн туран, инникитин да икки улуус ситимнэрин быспакка, бииргэ үлэлииллэригэр баҕарда.
Хадаар нэһилиэгин баһылыга Афанасий Степанов уонна И. М. Павлов аатынан Чурапчы орто оскуолатын Албан аат түмэлин салайааччыта Михаил Дьячковскай тахсан тыл эттилэр.
Тэрээһин түмүгэр мустубут дьон кэпсэтии тула тус санааларын үллэһиннилэр, этиилэри киллэрдилэр.
Салгыы Нам дэлэгээссийэтэ Көһөрүллүү мемориалыгар сибэкки дьөрбөтүн уурда.
Сиэр-туом ыытыллыан иннинэ Чурапчы улууһун баһылыгын социальнай боппуруостарга солбуйааччы Мария Кронникова устуоруйаны сырдата тыл эттэ.
Күн иккис аҥарыгар бырагыраама тута хас да былаһааккаҕа тэнийдэ:
С. А. Новгородов аатынан Чурапчы орто оскуолатыгар үөрэнээччилэргэ «коммунарский сбор» буолла
Ол кэмҥэ туспа бөлөх И.М. Павлов аатынан Чурапчы орто оскуолатын Албан аат уонна А.А.Саввин аатынан Чурапчытааҕы история уонна этнография түмэллэригэр ыалдьыттата
Ол кэннэ Хатылы нэһилиэгэр Көһөрүллүү түмэлигэр сырыттылар.
Маны сэргэ Ыччат киинигэр «Ылдьаа ыччаттара» диэн Хатыҥ Арыы эдэр актыыбнай ыччатын хамсааһына «Азбука Винокурова» диэн араас ыйытыылардаах оонньуу ыыттылар, ону сэргэ «И.Е. Винокуров нэһилиэстибэтэ: Саҥа көлүөнэ Көрүүтэ» диэн видеобаттл күрэҕин тэрийдилэр. Чурапчы эдэр ыччата И. Е. Винокуров Саха Сиригэр оруолун туһунан, саҥа көрүүнэн бэрт сэргэх, ураты видеолары кылгас бириэмэ иһигэр оҥорбуттарын жюри олус биһирээтэ.
Бу курдук көрсүһүү үтүө түмүктээх буолла, инникитин ситим салҕанарыгар олук уурулунна. Норуот сүдү киһитэ И.Е. Винокуров мындыр өйө-санаата эдэр көлүөнэ ыччакка үтүө холобур буолар, дойдубут үүнэ-сайда турарыгар төрүөт буолар.
«Нам улууһа» МО пресс-сулуспа матырыйалыттан
