Автор: 
Саха муудараһа этэринии, «Өй-санаа анаммыт киһитэ-түбүктээх олохтоох». Төрөөбүт дойдута, норуота сайдарын, олоҕо тупсарын, кэрэ эйгэтэ үксүүрүн туһугар “туох эрэ саҥаны, үйэлээҕи оҥорбут киһи” диэн сырдык ыра санаанан салайтаран, үлэлээбит киһи тугу оҥорбута, олоххо киллэрбитэ күн-дьыл ааһан истэҕин аайы өссө суолтата үрдээн, дириҥээн иһэр.
Быйыл муус устар 12 күнүгэр үйэлээҕи үйэтиппит Ытык киһибит, кыраайы үөрэтээччи Россия Суруналыыстарын союһун чилиэнэ, РСФСР норуотун үөрэҕириитин туйгуна, Саха АССР культуратын үтүөлээх үлэһитэ, бочуоттаах ветеран, Гражданскай килбиэн бэлиэ хаһаайына, республика суруналыыстарын «Кыһыл көмүс бөрүө», телерадио суруналыыстарын Сэбиэскэй Союз Геройа Н.А.Кондаков аатынан государственнай, поэт Н.М.Рыкунов аатынан улуус суруналыыстарын бириэмийэлэрин лауреата, Нам улууһун, Таастаах нэһилиэгин бочуоттаах киһитэ, төрөөбүт улууһун туһугар элбэх кылаатын киллэрбит Кривошапкин Иннокентий Захарович төрөөбүтэ 90 сылын туолла.
Иннокентий Захарович библиотеканы кытта ыкса сибээстээхтик үлэлээбитэ. Кини библиотека үтүө доҕоро, сүбэһитэ этэ. Библиотекабытыгар ыытыллар араас таһымнаах тэрээһиннэрбитигэр өрүү үөрэ-көтө кэлэн кыттыыны ылара, сүбэлээн-амалаан, көҕүлээн биэрэрэ. Улууска кыраайы үөрэтээччилэрин түмсүүтүн салайааччытынан, Нам улууһун Ытык сирдэрэ диэн хайысханан үрдүк таһаарыылаахтык үлэлээбитин түмүгэр улууспут историятын кэпсиир элбэх кинигэлэри хомуйан таһаартарбыта. Бу таһаартарбыт кинигэлэрэ библиотекабыт фондатыгар киирэн ааҕааччыларбыт киэҥ биһирэбиллэрин ылаллар. Маны таһынан улууспут ытык сирдэрин кэпсиир “Ытык сир ыралаах, кэрэ сир кэскиллээх”, “Олоҕум кэрчиктэрэ” диэн олорбут олоҕун, үлэтин уонна үлэһит буолуоҕуттан 60-ча сыл устатыгар араас кэмнэргэ алтыспыт улууспут сайдыытыгар тус кылааттарын киллэрсибит улуус биллиилээх дьонун туһунан кэпсиир “Намым дьоно” диэн дьоһун кинигэлэри суруйан хаалларбыта. Дьоҥҥо-сэргэҕэ өрүү көмөлөһө, туохха эмит мунаарбыт буоллахтарына хасыһан булан-талан, сүбэлээн-амалаан биэрэрэ. Иннокентий Захарович Кривошапкин төрөөбүт дойдутугар, улууһун дьонугар бэриниилээх патриот этэ. Кини төрөөбүт-үөскээбит улууһун сайдыытыгар сүҥкэн үйэлээх үлэлэри, бар дьонугар дьоһун кинигэлэри таһаартаран, улууһун дьонугар-сэргэтигэр үйэ-саас тухары тугунан да кэмнэммэт кылаатын киллэрбит киэн туттар киһибитинэн буолар.
