Автор: Нам улууһугар биллэриллибит киэн туттар биир дойдулаахпыт, биллиилээх общественнай уонна политическай деятель Илья Егорович Винокуров сылын чэрчитинэн Н.М.Рыкунов аатынан Нам киин библиотеката “Илья Винокуров-саха норуотун чулуу уола” медиаурок, кинигэ быыстапката, “Дойду сурахтаах, алаас ааттаах” интеллектуальнай оонньуу тэрийэн улуус нэһилиэктэринэн, Дьокуускай куоракка тэрээһиннэри ыытар.
Муус устар ыйга краеведческай салаа сүрүн библиотекара Раиса Дьяконова Дьокуускайга СӨ историктарын уонна кыраайы үөрэтээччилэрин V-с научнай-практическай конференцияларыгар “И.Е.Винокуров үтүө аата норуотун сүрэҕэр мэлдьи тыыннаах” уонна биллиилээх краевед, Нам улууһун Ытык киһитэ И.З.Кривошапкин 90 сылыгар “Үйэлээҕи үйэтиппит Ытык киһибит” диэн киэҥ ис хоһоонноох кинигэ быыстапкаларын тэрийбитэ дьон-сэргэ сэҥээриитин ыллылар.
Маны таһынан Искра, Салбаҥ, 2-с Хомустаах нэһилиэктэригэр оскуола оҕолоругар, эдэр ыччакка уруоктар, билиини тургутар оонньуулар ыытылыннылар.
Муус устар 10 күнүгэр үөрэх салаатын тэрийиитинэн «Өбүгэ суолунан” улуустааҕы өй оонньуута Таллан Бүрэ аатынан Бөтүҥ орто оскуолатыгар ыытылынна. Уопсайа улуус 10 оскуолаларыттан хамаандалар төрөөбүт түөлбэттэн, нэһилиэктэн саҕалаан улуус историятын, дьонун-сэргэтин, сирин-уотун билиигэ тургутуулары аастылар. Бу тэрээһиҥҥэ киин библиотека специалистара Раиса Дьяконова, Раиса Гоголева И.Е.Винокуров олоҕун, үлэтин туһунан сырдатан үөрэнээччилэргэ кэпсээтилэр.
Бу курдук, Илья Егорович Винокуров үтүө аатын үйэтитиигэ ыытыллар үлэ салҕанан бара турар.
Матырыйаалы бэлэмнээтэ Р.Гоголева
