Автор: 
Бүтүн арассыыйатааҕы тутааччы күнүн көрсө атырдьах ыйын 7 күнүгэр Н.М.Рыкунов аатынан Нам киин библиотекатыгар Российскай Федерация бочуоттаах тутааччыта, Саха Өрөспүүбүлүкэтин норуотун хаһаайыстыбатын Үтүөлээх үлэһитэ, Саха Өрөспүүбүлүкэтин Үтүөлээх тутааччыта, тыа хаһаайыстыбатын, үөрэх, доруобуйа харыстабылын уонна потребкооперациятын туйгуна, техническай наука кандидата, Нам улууһун уонна улуус 15 нэһилиэктэрин Ытык киһитэ Альберт Иннокентьевич Ильин олорбут олоҕун, үлэтин-хамнаһын, төрөөбүт улууһун сайдыытыгар киллэрбит сүҥкэн кылаатын туһунан сиһилии кэпсиир, сырдатар, аатын үйэтитэр “Наш Альберт Ильин” саҥа кинигэ биһирэмэ буолла.
Бу кинигэ 2008-2013 сылларга Нам улууһун баһылыгынан үлэлээбит, төрөөбүт улууһун уонна Саха Өрөспүүбүлүкэтин сайдыытыгар сүдү кылааты киллэрбит – Альберт Иннокентьевич Ильин олоҕор, элбэх хайысхаҕа үлэлээбит үлэтигэр ананар. Кинини кытта үлэлээбит биир идэлээхтэрэ, доҕотторо, аймахтара-чугас дьоно ахтыыларыгар төрөөбүт дойдутугар бэриниилээхтик үлэлээн олоҕун анаабыт, эрэллээх истиҥ доҕор уонна аҕа быһыытынан арыйаллар. Бу кинигэ – айымньылаахтык үлэлээбит киһиэхэ ытыктабылы көрдөрүү, кини эрчимэ уонна дьулуура махталлаах биир дойдулаахтарын дьыалаларыгар уонна сүрэхтэригэр олохсуйбута хаһан да сүтүө суоҕа.
Саҥа кинигэни таһаарар бу улахан сыралаах үлэ буолар. Кинигэни хомуйан оҥордулар Намнааҕы 2-с нүөмэрдээх орто оскуола нуучча тылын уонна литературатын учуутала Альбина Дмитриевна Ноговицына уонна СӨ социальнай харалта уонна архыып сулууспатын туйгуна Мария Николаевна Охлопкова. Кинигэ версткатын уонна дизайынын Герда Петровна Рудых оҥордо. “Наш Альберт Ильин” кинигэ 3 разделтан турар. Кинигэ киирии тылын Нам улууһун баһылыга Ю.И. Слепцов уонна улууспут депутаттарын Сэбиэтин председателэ А.И.
Винокуров суруйдулар.
Бастакы «Свидетельство коллег. Служение делу» разделга Альберт Иннокентьевыһы кытта бииргэ алтыһан үлэлээбит биир идэлээхтэрэ, кини баһылыктаан олорор кэмигэр үлэлэспит дьонноро, нэһилиэктэр баһылыктара, тэрилтэлэр салайааччылара ахтан-санаан ааспыт ахтыылара киирбиттэр. Иккис «Живой в памяти. Воспоминание родных и друзей» разделга кэргэнэ, аймахтара, бииргэ төрөөбүттэрэ, биир кэмҥэ үөрэммит үөлээннээхтэрэ, доҕотторо Альберт Иннокентьевич туһунан олус истиҥник, кинини тапталлаах убай, кэргэн, аҕа уонна эрэллээх доҕор быһыытынан арыйаллар. «След в истории. Публикации и увековечивании памяти» 3 разделга улууспут Эҥсиэли хаһыатыгар тахсыбыт Альберт Ильин туһунан, үлэлээбит үлэтин сырдатан суруллубут статьялар, публикациялар тиһиллэн киирбиттэр. Ону сэргэ, кини аатын үйэтитэр сыаллаах муниципальнай премия олохтоммутун сырдатыы, 2023 сылтан ыытыллар кыһыҥҥы спорт көрүҥнэрин фестивалынын түмүктэрэ, кыайыылаахтар хаартыскалара уонна кюар кодтаах техническай наука кандидата Альберт Иннокентьевич дисертацията киирэн бу разделы өссө кэҥэтэн- хаҥатан биэрэр.
Кинигэ 178 сирэйинэн, 100 ахсааннаах Дьокуускай куорат «Көмүөл» кинигэ кыһатыгар бэчээттэнэн таҕыста.
Тэрээһиҥҥэ кыттыыны ыллылар: автордар А.Д. Ноговицына, М.Н. Охлопкова, «Нам улууһа» муниципальнай оройуон баһылыга Ю И.Слепцов, техническэй наука доктора, профессор, Россия естествознание академиятын академига, РФ үрдүкү профессиональнай үөрэхтээһинин бочуоттаах үлэһитэ, СӨ наукатын үтүөлээх диэйэтэлэ, Саха сирин бочуоттаах тутааччыта, Кэбээйи улууһун уонна Уус-Алдан улууһун Курбуһах нэһилиэгин Ытык киһитэ А. Е. Местников, Ил Түмэн СӨ Судаарыстыбаннай мунньаҕын депутата А.П.Атласов, Россия бочуоттаах, СӨ үтүөлээх тутааччыта, муниципальнай сулууспа туйгуна, Чурапчы улууһун бочуоттаах олохтооҕо А.М.Кириллин, 2008-2013 сылларга улуус баһылыгын бастакы солбуйааччынан үлэлээбит, Саха Өрөспүүбүлүкэтин ыччат политикатын, физическай культуратын уонна спортун, үөрэҕин систиэмэтин, тыатын хаһаайыстыбатын туйгуна, П.Н. уонна Н. Е. Самсоновтар ааттарын сүгэр Хатас орто оскуолатын директора Н. В. Слепцов, 2011 сылтан улуус баһылыгын социальнай боппуруостарга солбуйааччынан үлэлээбит СӨ-н биологическай ресурсаларын Дирекциятын салайааччыта, СӨ-н Гражданскай сулууспатын туйгуна И.Р.Попов, өр сылларга Нам улууһун киин балыыһатын кылаабынай бырааһынан үлэлээбит, РФ доруобуйатын харыстабылын туйгуна, СӨ үтүөлээх бырааһын Л. А.Слепцов, СӨ ыччатын политикатын туйгуна, СВО ветерана, «Нам түмсүү» салайааччыта, СӨ Экологияҕа, айылҕаны туһаныыга уонна ойуур хаһаайыстыбатын министрестватын Уу хаһаайыстыбатыгар уонна халаан уутун содулун туоратыыга, чөлүгэр түһэрэр үлэни тэрийиигэ ситэриилээх дирекция салайааччыта Н.А. Соловьев, СӨ муниципальнай сулууспа туйгуна, «Гражданскай доблесть» бэлиэ хаһаайына, Маймаҕа нэһилиэгин Ытыктабыллаах киһитэ, муниципальнай сулууспа ветерана А. И. Егоров, Альберт Иннокентьевич чугас дьоно- аймахтара: СӨ транспорын бочуоттаах үлэһитэ, Нам улууһун Ытык киһитэ, үлэ ветерана П.В. Сергучев, бииргэ төрөөбүт балта Л.И.Левина, кэргэнэ СӨ тыатын хаһаайыстыбатын, култууратын туйгуна, тыа хаһаайыстыбатын наукатын кандидата, Дьокуускайдааҕы тыа хаһаайыстыбатын техникумун преподавателэ, СӨ ырыа айааччыларын сойууһун чилиэнэ – Л.Н.Ильина уонна Альберт Иннокентьевич күүстээх хамаандатын кытары улууһу салайыыга, үрдүк таһымнаах тэрээһиннэри тэрийиигэ, үлэни аттаран туруорууга опыт ылбыт, үлэ оскуолатын ааспыт администрация үлэһиттэрэ, ону сэргэ бииргэ алтыспыт, үлэлээбит доҕотторо, үөлээннээхтэрэ, бииргэ үөрэммит табаарыстара.
“Наш Альберт Ильин” саҥа кинигэ биһирэмэ истиҥ-сылаас ахтыы киэһэтэ буолан ааста. Улууспут баһылыга Юрий Иннокентьевич кинигэ ааптардарыгар, үлэлэспит дьоҥҥо Махтал суруктары, сибэкки дьөрбөтүн уонна кинигэлэри туттартаата. Альберт Иннокентьевиһы кытта Минстройга бииргэ үлэлээбит биир идэлээҕэ – Саха Өрөспүүбүлүкэтин архитектура уонна тутуу комплексын министрынан үлэлээбит Сергей Яковлевич Дереповскай куйаар ситиминэн ыыппыт эҕэрдэтин истэн, хаартысканан быыстапканы, видеороликтары көрөн ааспыт сылларга эргиллэн, ахтан-санаан ыллылар.
Альберт Иннокентьевич туһунан дьонҥо-сэргэҕэ аатын үйэтитэн бар дьоммутугар, ыччаттарбытыгар дьоһун бэлэх оҥорбут кинигэ автордарыгар, ахтыы суруйбут дьоммутугар, сыратын биэрэн туран үлэлээбит үлэтин туһунан санааҕытын этэн, сылаас-истиҥ тылларынан үллэстибиккитигэр ыалдьыттарбытыгар барҕа махталбытын тиэрдэбит.
Бука бары сүбэбитин, күүспүтүн холбоон, күн бүгүҥҥү тэтиммитин ыһыктыбакка, түмсүүбүтүн ыспакка, таптыыр Наммыт инники сайдыытын бииргэ быһаарыаҕын! – диэн Альберт Иннокентьевич тылларынан тэрээһиммитин түмүктээтибит.
