28.03.2024

Сахаарабыспыт «Олоҕум кэрчиктэрэ»

Кэнники сылларга үйэттэн үйэҕэ, көлүөнэттэн көлүөнэҕэ хаалар былыргы дьыллар быыстарын арыйан, төрөөбүт тапталлаах улууспут историятын, биллэр-көстөр бэлиэ дьоммут олохторун кэпсиир, үтүө өйдөбүнньүк буолар кэрэхсэбиллээх кинигэлэр тахсыылара элбээтэ.

Быйыл Саха АССР  культуратын үтүөлээх үлэһитэ, кыраайы үөрэтээччи Иннокентий Захарович Кривошапкин дьоһун олоҕун, таһаарыылаах үлэтин, бииргэ алтыспыт, үөрэммит, үлэлээбит дьонун-сэргэтин, сэрии суостаах сылларынааҕы оҕолор дьылҕаларын туһунан уустаан-ураннаан, хомоҕой тылынан сиһилии суруйбут, итини сэргэ кини туһунан үөлээннээхтэрин, доҕотторун, төрөппүт-ииппит ыччаттарын ахтыылара киирбит «Олоҕум кэрчиктэрэ” диэн дьоһун кинигэтэ бэчээттэнэн таҕаста. Бу иннинэ Иннокентий Захарович 2007 с. өр сылларга улуус бэтэрээннэрин сэбиэтин председателинэн үлэлээбит Матрена Васильевна Петрова олоҕун, үлэтин кэпсиир “Үлэни олоҕун сокуона оҥостон”, 2009 с. “Ытык сир ыралаах, кэрэ сир кэскиллээх”, 2017 с. “Намым дьоно” диэн үтүөкэн кинигэлэрэ бэчээттэммиттэрэ. Саҥа тахсыбыт «Олоҕум кэрчиктэрэ” кинигэ 200 ахсаанынан, 440 сирэйинэн “Көмүөл” кинигэ кыһатыгар бэчээттэнэн таҕыста. Кинигэ киирии тылын истиҥ-иһирэх тылынан суруйбут ааптар олоҕун аргыһа Альбина Георгиевна, кинигэ уон биир түһүмэхтэн турар, түһүмэхтэр иннилэригэр Чаҕылҕан, Саха народнай суруйааччылара Иван Гоголев, Леонид Попов, Семен Данилов уонна Иван Саввин, Юрий Потапов-Саргын хоһоонноруттан быһа тардыылар киирбиттэр. Кинигэҕэ Иннокентий Захарович туһунан уопсайа 24 ахтыы, үлэтин, дьиэ кэргэнин туһунан киэҥник кэпсиир хаартыскалар, библиографическай ыйынньык киирбиттэр. Кинигэ таһыгар, титульнай лииһигэр биир дойдулаахпыт, художник Алексей Евстафьев “Сайын” диэн уруһуйа туттуллубут. Кинигэ кэннигэр ааптар туһунан билиһиннэрэр кылгас биографията суруллубут.

Иннокентий Захарович былаана киэҥ, ол курдук аны икки кинигэни таһаартарар былааннаах.

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять