29.03.2024

Күөх налыы дойдум иэнэ

Саха биллиилээх поэта, тылбаасчыт, биир дойдулаахпыт И.Д.Винокуров- Чаҕылҕан 105 сааһыгар аналлаах » Күөх налыы дойдум иэнэ» краеведческай марафоммутун сэтинньи 11 күнүттэн саҕалаатыбыт. Бу марафоммут Чаҕылҕан » Намҥа» диэн хоһоонунан салаллан Намнааҕы кииннэммит библиотечнай ситим библиотекалара нэһилиэнньэҕэ И.Д.Винокуров- Чаҕылҕан олоҕун, айар үлэтин билиһиннэриилэрэ буолар.
Марафоммут Хатыҥ- Арыы нэһилиэгиттэн саҕаламмыта биир эмиэ суолталаах хардыы буолар. Хатыҥ- Арыы нэһилиэгэ үс Винокуровтар төрүт сирдэринэн буолар: государственнай,
политическай деятель И.Е. Винокуров, сахалартан биир бастакы композитор З.П.Винокуров уонна И.Д. Винокуров- Чаҕылҕан.
Марафон сыала- соруга: суруйааччы олоҕун, айымньыларын киэҥ араҥаҕа- нэһилиэнньэҕэ тиэрдии, тарҕатыы. Биир дойдулаахпытынан киэн туттуу.
Марафон бастакы хардыытын бэлиэтин Бөтүҥ нэһилиэгин модельнай библиотекатын библиотекара Колесова Валентина Спирдоновна тутан Хатыҥ- Арыы И.Е. Винокуров аатынан оскуолаҕа «Чаҕылҕан күнэ» сарсыарда линейкаттан саҕаланна. Чуопчаарар кырачаан дьоннорбут хоһоон ааҕан добдугураттылар, » Хайыһар» ырыаны ыллаатыбыт. Ол күн элбэх хоһоон аа5ылынна, ырыа ылланна. Валентина Спирдоновна » Таллан Бүрэ уонна Чаҕылҕан доҕордуу поэттар» диэн ис хоһоонноох 5 кылаастарга уруок ыытта. Бу уруокка улахан кылаас оҕолоро хоһоон ааҕан кырачаан доҕоторугар бэлэхтээтилэр.
Ол кэннэ салгыы марафон хардыы бэлиэтин Түбэ нэһилиэгин библиотекара Юлия Алексеевна Иванова тутан Хатырык нэһилиэгин М. А. Охлопкова аатынан Хатырыктааҕы модельнай библиотекаҕа кэлэн оҕолорго литературнай уруок ыытта. Оҕолор олус интэриэһиргээн истибиттэрэ уруок түмүгэр билиннэ. Юлия Алексеевна кэрчик хоһооннору ааҕыталаан, араас соһуччу ыйытыктары биэрбитигэр эппиэт биэрэ оҕустулар. Оҕолор Чаҕылҕан айымньыларын кытта ситимнээхтэрин, ол аата ааҕалларын сөбүлүүллэрин көрдөрдө. Биһиги онтон библиотекарьдар, ааҕыыны кытта биир быстыспат баайыылаах дьон астынныбыт, дуоһуйдубут. Салгыы М.А.Охлопкова аатынан модельнай библиотека заведущайа Ульяна Николаевна Антонова марафон бэлиэтин тутан Модут нэһилиэгэр сэтинньи 13 күнүгэр тиийэн ыытыаҕа.
Ити курдук И.Д. Винокуров- Чаҕылҕаҥҥа аналлаах » Күөх налыы дойдум иэнэ» литературнай марафон Нам улууһун нэһилиэктэринэн айаҥҥа турунна.

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять