26.02.2024

Максим, эн үтүөҥ үйэттэн үйэҕэ ахтылла туруо!

Бэс ыйын 14 күнүгэр ааҕар саалабытыгар  «Максим, эн үтүөҥ үйэттэн үйэҕэ ахтылла туруо!” диэн Максим Кирович Аммосов — дьоһун олоҕун үөрэппит, чинчийбит, тыыл, үлэ бэтэрээнэ, историк-краевед, ССРС өҥнөөх металлургиятын туйгуна, Саха АССР үтүөлээх геолога, РФ уонна СӨ профсоюзтарын бочуоттаах бэтэрээнэ, Нам уонна Усуйаана улуустарын бочуоттаах олохтооҕо, Түбэ уонна Хатырык нэһилиэктэрин Ытык киһитэ, “Гражданскай килбиэн” бэлиэ хаһаайына Иван Петрович Пестряков “Аммосов Максим Кирович-сэбиэскэй государственнай партийнай деятель” диэн  үһүс кинигэтин биһирэмэ олус истиҥник буолан ааста. Кинигэ  Саха АССР 100 сылыгар түбэһиннэрэн бэчээттэнэн 2022 сыллаахха тахсыбыта. Ааптар  кинигэтин матырыйаалларын бэчээккэ бэлэмнээн баран, хомойуох иһин олохтон туораан, кыайан таһаартарбатаҕа,  оҕолоро Хотугулуу-Илиҥҥи Федеральнай университет издательскай дьиэтигэр 200 ахсаанынан, 152 сирэйинэн бэчээттэтэн таһаартарбыттара.

Тэрээһиҥҥэ Иван Петрович кыргыттара Пестрякова Татьяна Ивановна, Бережнова Елена Ивановна,  күтүөтэ Афганистан сэриитин буойуна, ветеран Бережнов Юрий Владимирович, сиэннэрэ Юлия, аймах-билэ дьоно уонна Түбэ нэһилиэгин олохтоохторо кыттыыны ыллылар. Кыргыттара баай ис хоһоонноох презентация оҥорон аҕаларын туһунан кэпсээтилэр. Ааптар кинигэлэрэ архыып докумуоннарыгар тирэҕирэр буоланнар  улахан суолталаахтарын, Максим Аммосов олорон ааспыт олоҕун, үлэтин салгыы үөрэтиигэ, чинчийиигэ  көмөлөөх кинигэлэр буолалларын  кэлбит ыалдьыттар бэлиэтээн эттилэр. Төрөөбүт дойдутуттан кэлбит ыалдьыттар Розалия Егоровна Лукина, Марита Афанасьевна Сивцева, Полина Ивановна Никонова, Петр Попов Иван Петрович төрөөбүт дойдутун – Түбэ нэһилиэгин историятын XVIII үйэттэн саҕалаан, сирин-уотун, үлэһит дьонун туһунан утумнаахтык дьарыктанан дьоҥҥо-сэргэҕэ биһирэппит хас  да кинигэни суруйан хаалларда диэн кэпсээн туран махталларын тиэртилэр. Бэйэлэрин музыкальнай эҕэрдэлэрин тиэртилэр Сардана Аргунова, Галина Кривошапко аатынан СӨ Государственнай филормония Симфоническай хорун артыыһа  Петр Попов, Аскалон Егоров ыллаан иһитиннэрдилэр.

Иван Петрович  ханнык да үлэҕэ үлэлээн бэйэтин бэлиэ суолун-ииһин хаалларбыт киһинэн буолар, ол курдук өрөспүүбүлүкэбит промышленноһа, норуот хаһаайыстыбата сайдыытыгар кылаата сүҥкэн.. Бочуоттаах сынньалаҥҥа да тахсан баран таһаарыылаахтык үлэлээн-хамсаан, улууспут историятын, биллэр-көстөр дьоммут туһунан кэпсиир кинигэлэрэ үйэ-саас тухары кэнчээри ыччаппытыгар кэпсии-ипсии туруохтара.     

 

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять