Автор: 
Бу дьыл атырдьах ыйын 14 күнүгэр Саха норуодунай суруйааччыта, общественнай деятель, П.А. Ойуунускай аатынан Саха Өрөспүүбүлүкэтин судаарыстыбаннай бириэмийэтин лауреата, Россия Суруйааччыларын сойууһун Үрдүкү сүбэтин чилиэнэ, Саха Өрөспүүбүлүкэтин Духуобунаска академиятын вице-президенэ, Нам, Кэбээйи улуустарын Ытык киһитэ, Саха Өрөспүүбүлүкэтин Бочуоттаах олохтооҕо Николай Алексеевич Лугинов 75 сааһын туолбута.
Бу кэрэ-бэлиэ даатаны Нам улууһун олохтоохторо, общественноһа киэҥник бэлиэтээтэ. Нам кииннэммит библиотекаларын тиһигэ суруйааччы юбилейын көрсө элбэх тэрээһиннэри ыытта. Улуус библиотекаларыгар кинигэ быыстапкалара тэрилиннилэр, литературнай уруоктар, күрэхтэр ыытылыннылар. Н.М.Рыкунов аатынан киин библиотека специалистара Раиса Дьяконова, Наталья Павлова Н.С.Охлопков аатынан улуустааҕы гимназияҕа, И.С.Гаврильев аатынан бастакы нүөмэрдээх уонна иккис нүөмэрдээх орто оскуолаларыгар суруйааччы олоҕун, айар үлэтин кэпсиир «Айар үлэ умсулҕана» уруоктары улахан кылаас үөрэнээччилэригэр ыыттылар. Оҕо модельнай библиотекатын сэбиэдиссэйэ Варвара Бережнева улуустааҕы гимназия 7-8 кыл үөрэнээччилэригэр “Суруйааччы сиртэн, норуоттан үүнэн тахсар” диэн кылаас чаастарын ыытта.
Алтынньы 17 к. Нам улууһун Үөрэҕин салалтата уонна киин библиотека көҕүлээһиннэринэн үөрэх тэрилтэлэрин икки ардыларыгар «Лугинову ааҕабын» -суруйааччы айымньыларын уус-ураннык дорҕоонноохтук ааҕыыга улуустааҕы күрэх ыытылынна. Күөн күрэскэ 42 улахан дьон (учуутал, төрөппүт, уһуйаан иитээччитэ), 36 үөрэнээччи кытыннылар. Сиһилии сигэни баттаан аах
«Мин уонна Лугинов» диэн ааттаах эссе суруйуутугар ааҕааччылар суруйааччы айымньыларын ааҕан баран санааларын үллэһиннилэр. Уопсайа 18 киһи кытынна, ол иһигэр 7 үөрэнээччи. Киин библиотека үлэлэри түмэн хомуурунньук оҥорон бэчээттэн таһаарда.
Алтынньы 20 к. Эҥсиэли хочотугар кэрэ-бэлиэ күн буолла. Народнай суруйааччы Николай Алексеевич Лугинов Нам улууһугар ыалдьыттаата. Аан бастаан Хамаҕатта орто оскуолатыгар улуус үөрэнээччилэрин, учууталларын кытта көрүстэ. Оҕолор төрөөбүт дойдуга, тылга аналлаах литературнай дьүһүйүүлэри аахтылар, суруйааччыны кытта атах тэпсэн олорон кэпсэттилэр. Салгыы Н.Лугинов тапталлаах кэргэнэ Наталья Егоровна төрөөбүт дойдутугар Модукка сырытта. Модут олохтоохторо итии чэйдээх, минньигэс астаах сандалы тула олорон санаа атастастылар, олохтоох библиотека тэрийэн ыыппыт “Кустук” сэһэнигэр олоҕуран ыытыллыбыт комикс күрэҕин кыайыылаахтарыгар суруйааччы автографтаах кинигэлэрин бэлэх туттарда.
Күнүс 15:00 чаастан култуура уонна духуобунай сайдыы дыбарыаһыгар Николай Алексеевич Лугинову 75 үбүлүөйдээх сааһынан чиэстээһин үөрүүлээх тэрээһинэ буолла.
Тэрээһини улуустааҕы кииннэммит библиотечнай ситим дириэктэрэ Майя Софронова иилээн – саҕалаан ыытта уонна Н.А.Лугинов айымньытынан туруоруллубут литературнай дьүһүйүүнү көрдөрүүттэн саҕаланна.
Тэрээһин кэпсэтии быһыытынан истиҥник ааста.
Нам улууһун баһылыга Юрий Слепцов Николай Алексеевич Лугинову 75 сааһын туолбут үбүлүөйүнэн улуус олохтоохторун, общественноһын уонна тус бэйэтин аатыттан итиитик-истиҥник эҕэрдэлээтэ, Эҕэрдэ сурук, «За вклад в развитие культуры МО «Намский улус» бочуоттаах бэлиэни, үс атахтаах сахалыы чороон бэлэх туттарда.
Ленскэй уонна Модут нэһилиэктэрин баһылыктара, «Отуу уота» литературнай түмсүү чилиэттэрэ, Кэбээйи улууһун түмсүүтэ эҕэрдэлээтилэр.
Тэрээһини СР норуодунай артыыстара Александр Емельянов, Анегина Дьяконова, үҥкүү, ырыа коллективтарын музыкальнай эҕэрдэлэрэ киэргэттилэр.
СӨ норуодунай суруйааччыта Николай Лугинов ураты истиҥ көрсүһүүлэр, уун утары олорон кэпсэтиилэр, сэһэргэһиилэр тэриллэн ыытыллыбыттарыгар Нам улууһун дьонугар-сэргэтигэр дириҥ махталын биллэрдэ.
Киин библиотека «Үрдүк анал-үйэлээх өйдөбүл» диэн киэҥ ис хоһоонноох суруйааччы олоҕор, айар үлэтигэр аналлаах быыстапката тэрээһини киэргэттэ. З.П. Винокуров аатынан Намнааҕы оҕо искусствотын оскуолата Николай Лугинов айымньыларынан уруһуй күрэҕин быыстапкатын туруоран дьон сэҥээриитин ылла.
Үөрүүлээх тэрээһиҥҥэ Киин библиотека электроннай ресурсалар отделын специалистара видеоконтент, презентация оҥордулар.
