Автор: 
Төрөөбүт литературабыт чэлгийэ сайдарын туһугар туох баар эдэр сааһын эрчимин, олоҕун күөгэйэр күннэрин, сааһырбыт кэмнэрин дириҥ муудараһын бүтүннүүтүн анаабыт ытыктабыллаах суруйааччыларбытыттан биирдэстэринэн народнай суруйааччы Николай Гаврилович Золотарев-Николай Якутскай буолар. Николай Якутскай быйыл сэтинньи 22 күнүгэр төрөөбүтэ 115 сылын туолла. Суруйааччы үбүлүөйдээх сылынан Н.М.Рыкунов аатынан киин модельнай библиотека үлэһиттэрэ Н.Охлопков аатынан улуустааҕы гимназия үрдүкү кылаас үөрэнээччилэригэр “Норуот тапталлаах суруйааччыта — Николай Якутскай” диэн суруйааччы күннэрин ыыттыбыт. Манна оҕолор суруйааччы олоҕун, айар үлэтин билистилэр. Николай Якутскайы – саха суруйааччыларыттан аан бастакынан промышленность тематыгар үлэлээбит суруйааччы диэн бэлиэтииллэр. Оннук суруйууларыттан “Көмүстээх үрүйэ” диэн сэһэнэ буолар. Бу сэһэни оҕолор саха литературатын уруогар барбыт буоланнар тутатына сэргии иһиттилэр уонна сэһэн тула кэпсэтии буолла. Саха ааҕааччытын кутун туппут «Төлкө» романын, «Араҥ уонна таптал» сэһэнин билиһиннэрдибит. Суруйааччы 1991 сыллаахха 85 сааһыгар төрөөбүт дойдутугар Үөһээ Бүлүү Харбалааҕар баар Дөлөкөй алааһыгар кэлэ сырыттаҕына көрсүһүү түгэниттэн уһуллубут видеоны кэрэхсии көрдүлэр. Тэрээһин түмүгэр оҕолор суруйааччы олоҕун, үлэтин туһунан боппуруостарга эппиэттээтилэр харда бэйэлэрин боппуруостарн биэрэн хоруй ыллылар.
Ити курдук биһиги бары ытыктыыр, үйэлэргэ умнубат народнай суруйааччыбыт Николай Гаврилович Золотарев-Николай Якутскай өлбөт үйэлээх айымньыларын ыччат дьоммутугар кэпсээтибит, билиһиннэрдибит.
