05.03.2024

Хатырыкка саҥа библиотека аанын арыйда

Олунньу 10 күнүгэр Хатырык нэһилиэгэр дьоро күн үүннэ. Олохтоохтор өр күүппүт культурнай, спортивнай,  элбэх хайысхалаах киин үлэҕэ киирбитин үөрэ-көтө бэлиэтээтилэр. Киин арыллыытыгар Саха Республикатын Президенэ А.С.Николаев, үгүс ыҥырыылаах ыалдьыттар кыттыыны ыллылар. Бу саҥа кииҥҥэ спортзал, кулууп, музыкальнай оскуола, библиотека киирдилэр.

Нам улууһугар бастыҥ үлэлээх, киэҥ историялаах, Саха АССР культуратын үтүөлээх үлэһитэ, ССРС культуратын туйгуна М.А.Охлопкова аатын сүгэр Хатырык модельнай библиотеката уопсай иэнэ 189 кв.м. буолла. Оҕолорго, улахан дьоҥҥо аналлаах ааҕар саалалар, саҥа компьютердаах медиа-киин, кинигэ фондатын харайар туспа хос баар буоллулар. Саха Өрөспүүбүлүкэтин инвестиция программатынан үбүлэнэн саҥа миэбэлинэн толору хааччыллыбыт аныгылыы тупсаҕай библиотекаҕа ааҕааччылар түмсэр, билиигэ тардыһар  сирдэрэ буолуоҕа.

Библиотеканы 37 сылын  СР культуратын туйгуна Антонова Ульяна Николаевна салайар. Сүрүн библиотекарынан Местникова Татьяна Арыяновна, техүлэһитинэн  Охлопкова Елена Ивановна үлэлииллэр.

Дьоро күҥҥэ библиотека үлэһиттэрэ үтүө суобастаах, кыһамньылаах үлэлэрин иһин наҕараадалары туттулар. Антонова У.Н. – Ил Түмэн культураҕа, СМИ-гэ комитетын Бочуотунай грамотатынан, Местникова Т.А.-«Нам улууһа» МТ Баһылыгын Бочуотунай грамотатынан, Охлопкова Е.И.- «Нам улууһа» МТ Баһылыгын Махтал суругунан наҕараадаланнылар.

Күндү коллегаларбытын эҕэрдэлиибит уонна баҕарабыт эппиэтинэстээх, түбүктээх үлэҕитигэр үрдүктэн үрдүк ситиһиилэри, кэскиллээх саҕахтары, дьоһун бырайыактары. Библиотека куруутун ааҕааччылары ыҥыра, угуйа, дьон биһирэбилин, махталын ыла турдун диэн баҕа санаабыт бастыҥын тиэрдэбит!

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять