Автор: 
Төрөөбүт тыл уонна сурук-бичик күнүн чэрчитинэн олунньу ый 14 күнүгэр Николай Рыкунов аатынан киин модельнай библиотекаҕа Саха Өрөспүүбүлүкэтин норуотун хаһаайыстыбатын үтүөлээх үлэһитэ, «Бастыҥ драматург» Алампа Соппуруонап аатынан уопсастыбаннай лауреат, Саха Өрөспүүбүлүкэтин норуодунай суруйааччыта, уопсастыбаннай уонна бэлитиичэскэй диэйэтэл, Амма уонна Үөһээ Бүлүү улуустарын бочуоттаах олохтооҕо Дмитрий Федосеевич Наумов ыалдьыттаата.
Дьокуускай куораттан «Отуу уота» литературнай түмсүү салайааччыта Алексей Татаринов-Удьурҕай сымнаҕас олбохтоох массыынатыгар аргыс оҥостон сэлэһэн-кэпсэтэн кэллилэр. Сахалыы сиэринэн дьоһун киһибитин чаайдата олорон кэпсэтэбит, 3–с этээскэ “аҕылаан таҕыстыбыт” дэһэллэр Отуулар, “онтон Дмитрий Федосеевичпытын сүтэрэн кэбистибит, киҺибит утары бу турар” диэн күлсүү буолла.
Норуот суруйааччытын кытта көрсүһүүгэ, кини айымньыларын сүгүрүйээччилэрэ, «Отуу уота» литературнай түмсүү чилиэннэрэ кэлэн кыттыыны ылан санааларын атастаһан, истиҥ, сылаас кэпсэтиилэрдээх күн ааста.
Көрсүһүү иннинэ кэлбит ыалдьыттар «кинигэлэрбин тутан олордуннар, билистиннэр» диэн Миитэрэй Наумов айымньыларын сөбүлээн ааҕар ааҕааччыларыгар, суруйааччы илии баттааһыннаах 2023 сыллаахха тахсыбыт “30 кэпсээн” уонна “Ааспыт үйэ оҕолоро, аныгы үйэ оҕонньотторо” кинигэлэрин бэлэх уунна.
Дмитрий Федосеевич Наумов ааҕааччыларын кытта атах тэпсэн олорон, аргыый аҕай кэпсээнин тардан кэбистэ. Дьэ, кырдьык да билэрэ-көрөрө элбэҕэ, бииртэн биир кэрчик тиэмэ арыллан истэ. Саха сирин чулуу дьоннорун алтыспытын, хайдах кинилэр тустарынан аймньылара суруллубут историяларын кэпсээтэ. Ааҕааччылар ыйытыыларыгар хоруйдаан, бу кэпсэтиилэрбит барыта бэрт сэргэхтик, интэриэһинэйдик, эмиэ да быыһыгар дьээбэлээхтик ааһан сүргэ көтөҕүлллэн Дмитрий Федосеевич «30 кэпсээниттэн» биир кэпсээни ааҕан күлсүү-үөрүү буолла.
Түмүккэ Дмитрий Федосеевич библиотекаҕа кинигэлэрин бэлэхтээтэ, дьиҥ норуот суруйааччытынаан көрсөн, ааҕааччылар, тэрийээччилэр астынан-дуоһуйан туран махталбытын биллэрдибит
