Автор: 📚Дьиэ-кэргэн, эрэл, таптал, дьол күнүгэр аналлаах от ыйын 8 күнүгэр РФ Пенсионнай уонна социальнай строхования салаатын Намнааҕа килийиэн сулууспатын «Сайдыы» киинигэр Арассыыйаҕа «Дьиэ-кэргэн» сылын чэрчитинэн Намнааҕы килийиэн сулууспатын үлэһиттэрин, улуус кырдьаҕастарын сэбиэтин уонна Н.Рыкунов аатынан киин библиотека үлэһиттэрин тэрийиилэринэн улууспут киэн туттар ыалларын Светлана Иннокентьевна, Василий Егорович Никоновтары уонна Уус-Алдан улууһун Баатаҕай нэһилиэгиттэн төрүттээх Александра Алексеевна, Анатолий Иванович Степановтары кытта истиҥ көрсүһүү буолла. Талба талааннаах ыалларбыт араас оҥоһуктарын, кэрэ көстүүлээх бэйэлэрэ баайбыт таҥастарын, уруһуйдарын көрдөрүүгэ туруоран дьон-сэргэ биһирэбилин ыллылар. Кэлбит ыалдьыттарга бүгүҥҥү бэлиэ күммүт историятын Винокуров Арсен Викторович сиһилии билиһиннэрэн ыалдьыттар сэҥээриилэрин ылла. Бочуоттаах ыалдьыттарбыт Никоновтар, Степановтар бэйэлэрин билиһиннэрэн, оҥоһуктарын көрдөрөн, кэпсээн баҕа санааларын, эҕэрдэлэрин эттилэр. Дьяконова Раиса Николаевна библиотекабыт фондатыгар баар саха ыалыгар сыһыаннаах бастыҥ кинигэлэрин билиһиннэрдэ. Эҕэрдэ тылларын тиэртилэр Пенсионнай уонна социальнай страхования салаатын Намнааҕы килийиэн сулууспатын салайааччыта Бурцев Евгений Михайлович уонна улуус кырдьаҕастарын сэбиэтин председателэ Кобякова Софья Дмитириевна. Тэрээһиммит түмүгэр дьиэ-кэргэҥҥэ сыһыаннаах викторинаҕа ыалдьыттар көхтөөхтүк кыттан, боппуруостарга сөптөөх элбэх эппиэттэри биэрэн Софья Дмитриевна Кобякова уонна Гаврильева Авдотья Никифоровна сэмэй бириистэри туттулар.
