1917 сыллаахха бэс ыйын 7 күнүгэр Нам оройуонун Салбаҥ нэһилиэгэр төрөөбүтэ. 1 Атамай 4 группалаах оскуолатын бүтэрэн баран, Нам оройуонугар үөрэммитэ. 1936-1939 сс. Дьокуускайдааҕы учуутал техникумун бүтэрэн, Салбаҥҥа учууталлаабыта. 1940-1942 сс. Таастаах оскуолатыгар үлэлээбитэ. Нэһилиэк культурнай олоҕор көхтөөхтүк кыттара. “Колхоз кыһата” диэн хаһыат таһаарар этэ. Гитараҕа, мандолинаҕа үчүгэйдик оонньуура.
Аҕа дойду сэриитигэр 1942 сыл бэс ыйын 26 күнүгэр ыҥырыллыбыта. Охсуһуу хонуутугар кыайан киирбэтэҕэ, ыараханнык ыалдьан Казань куоракка госпитальга эмтэммитэ. Доруобуйатынан сыыйыллан 19.08.1943 с. дойдутугар төннүбүтэ. Уһун айаҥҥа ыарыыта бэргээн, Дьокуускай куоракка балыыһаҕа 1943 с.алтынньы ыйга сырдык тыына быстыбыта.
Дорообо, эдэр саас чаҕыла
Мин эйигин саататыам
Сытыы хараҕым уотунан,
Күүтэ-күүтэ битийбит
Эдэр сүрэх тапталынан.
Мин эйигин саататыам
Сааскы көрсүһүү үөрүүтүнэн,
Симэх хампа кэппит
Дьикти айылҕа көрүҥүнэн.
Мин эйигин саататыам
Музыкам көрдөөх тыаһынан,
Тыа быыһа ыккыйбыт
Туолбут кэрэ ырыатынан.
Мин эйигин саататыам
Битии тэппит үҥкүүнэн,
Оҕо ыччат мунньустубут
Оонньуу кэрэ көҕүнэн.