1914 сыллаахха Нам улууһун Ленскэй нэһилиэгэр төрөөбүтэ. Намҥа 7 кылаастаах оскуоланы бүтэрбитэ. Активнай комсомолец буолан, 1933 с. рабселькордар Саха сиринээҕи II республикатааҕы конференцияларыгар кыттыыны ылбыта, 1935 с. Саха сиринээҕи комсомольскай тэрилтэ VIII конференциятыгар делегатынан сылдьыбыта.1934 сылтан сэриигэ барыар диэри Хатырык, Хамаҕатта, Түбэ, Нам оскуолаларыгар учууталынан үлэлээбитэ. 1941 с. армияҕа ыҥырыллыан аҕай иннинэ, оройуоннааҕы педкабинет библиотекарь-лаборанынан анаммыта. 1941 с. от ыйын 28 күнүгэр бастакы хомуурга сэриигэ ыҥырыллыбыта. Байыаннай училищеҕа үөрэнэн, младшай лейтенант званиетын ылбыта. Фроҥҥа тиийэн Григорий Игнатьев 36 армия взводун командира буолбута. Эдэр офицер 1942 с.от ыйыгар кыргыһыы хонуутугар өлбүтэ. Ханна көмүллүбүтэ биллибэт.
Григорий Прокопьевич нуучча суруйааччыларын айымньыларын кыра эрдэҕиттэн үлүһүйэн туран ааҕара, хоһоон,ырыа суруйар идэлээҕэ. Ону таһынан, нуучча суруйааччыларын айымньыларын тылбаастыырга холоммут. Аҕыйах хоһоонноро оройуон, урукку «Колхоз сирдьитэ» хаһыакка бэчээттэммиттэрэ.
Күлэр күн
Хайҕалы тыллыырбар,
Тапталы ыллыырбар,
Дьоллорго тиксэрбэр,
Дьоннорго биллэрбэр,
Көрүнэн сылдьарбар,
Көҕүнэн буоларбар,
Норуоттан махталы,
Бар дьонтон уох тылы,
Ыларбар, үөрэрбэр,
Айарбар, күннүүрбэр,
Күлэр күн-сүрэхпин төлөннөө!
Эдэркээн саастарбар
Эҥини билэрбэр,
Бу дьоллоох күннэрбэр,
Ырыанан күүрэрбэр,
Чэгиэнчэй сүрэхтээх,
Лыҥкыныыр иҥиирдээх,
Тырымныыр харахтаах,
Ылымныыр хааннардаах,
Киппэ чиҥ эттэрдээх,
Доруобай бэйэлээх
Буоламмын сылдьарбар,
Көҥүллүк тыынарбар,
Күлэр күн-сүрэхпин төлөннөө!
Бука диэн норуоппар,
Төрүөбүт мин ааппар
Ырыаны күүстээхтик,
Сүрэхтэн эрдээхтик,
Матыыбы тардарга
Куолаһы ыларга,
Ол куолас дорҕооно,
Дьиэрэйэр хоһооно,
Советскай дьиэлэргэ
Сириэдийэр бу сиргэ,
Тарҕаныа аатыгар
Ылланыа дьолугар
Күлэр күн-сүрэхпин төлөннөө!
1939 с. Хамаҕатта
***
Оҕо үүнэр сааспынан
Мин киэн туттабын.
Күндү сүрэҕим ырааһынан
Ырыа тойук туойабын.
Ыраас сырдык өйбүнэн
Дьолу көрсүөх буолабын,
Бэйэм таптыыр идэбинэн
Кынаттанан көтөбүн.
Арай өстөөхтөргө-
Сүлүһүн тылы туттабын.
Хааннаах хадаар өһөхтөргө-
Итии сибиньиэс кутабын.
1940 с. Хамаҕатта
Партизан Железняк
(М.Голоднайтан)
Херсоммут анныгар
Үүнүүлээх да оттор,
Херсоммут анныгар-курган.
Отунан бүрүллэн,
Кургаммыт анныгар
Сытар Железняк партизан.
Одессаҕа иһэн,
Херсоҥҥа ой, кэлэн-
Этэрээт тоһуурга хаптарда.
Хаҥас бар-застава,
Уҥа бар-Махнолар,
Уон эрэ гранат хаалбыта.
“Оҕолоор. – диэтэ
Этэрээт диэки хайыһаат
Матрос партизан Железняк –
Херсоммут бэрт чугас,
Штыгы доҕор туттан,
Киириэҕин, уон гранат син баар”
Байыастар этэллэр: -
“Штыгы доҕор туттан,
Киириэҕин, уон гранат син баар”
Гранаттаах да штыктаах,
Байыастар киирдилэр...
Оо, хаалла тыаҕа Желязняк.
Көрдөөх ырыалары
Ыллыыр Украина,
Дьоллоох саас онно эргийэр.
Подсолнух үүнэтэлиир.
Истиэби кый үрдүнэн
Көтөр аал көтөн тэлээрэр.
Херсоммут анныгар
Үүнүүлээх да оттор,
Херсоммут анныгар-курган.
Отунан бүрүллэн,
Кургаммыт анныгар
Сытар Железняк партизан.
1940 с. Хамаҕатта