Автор: Чаҕылхай, сиккиэр тыаллаах сааскы сайаҕас ыам ыйын 15 күнүгэр ааҕар саалабытыгар бэрт үөрүүлээх тэрээһин буолан ааста. Ол курдук бу күн библиотека иһэ дьон-аймах чаҕылыҥнас саҥатынан, истиҥ үтүө санаа сүүрээнинэн туолла.
Бу күн — поэзия алыптаах абылаҥар сүгүрүйэр айар дьоҕурдаах доҕотторун муста улуустааҕы «Отуу уота» литературнай түмсүү чилиэнэ, СӨ суруйааччыларын сойууһун, Нам улууһун «Отуу уота» литературнай түмсүү чилиэнэ, «Нам улууһун култууратын сайдыытыгар кылаатын иһин» бэлиэ хаһаайына, үлэ бэтэрээнэ Мария Петровна Мохначевская – Марта –Мария. Марта-Мария үөрүүтүн үллэстэ, айар үлэтин 10 сылын көрсө саҥа кинигэтин биһирэмниир «Миигин күүтүҥ» диэн истиҥ-иһирэх тэрээһиҥҥэ чугас дьоно, аймахтара, дьүөгэлэрэ, биир кэрэ түгэҥҥэ сылдьар дьоно-сэргэтэ муһуннулар.
«Миигин күүтүҥ» кинигэбит быйыл 2026 сылга 50 ахсаанынан, 112 сирэйинэн, «Офсет» кинигэ кыһатыгар бэчээттэнэн тахсыбыт. Кинигэ аан тылыгар ааптар Марта-Мария «Уон сыл» диэн ахтыыта киирдэ.
Марта-Мария айар үлэтин билиһиннэрэр, көрдөрөр «Олох диэн, Эн чахчы кэрэҕин» диэн быыстапка турда.
Тэрээһиҥҥэ «Нам улууһа» МО баһылыгын солбуйааччы Юрий Дьяконов, култуура уонна духуобунай сайдыы салалтатын специалиһа Ирина Винокурова истиҥ тылынан эҕэрдэлээн, эҕэрдэ суруктары туттаран айар үлэтигэр өссө ситиһиилэри баҕардылар.
«Отуу уота» литературнай түмсүү чилиэннэрэ (салайааччы Алексей Михайлович Татаринов -Удьурҕай) кэлэн өрүүтүн да истиҥ-сэргэх дьоннор Марта-Марияларын эҕэрдэлээн, хоһооннорун да ааҕан, ырыаларын да ылаан сүргэни көтөхтүлэр.
Нам улууһун «Туллук хаара» ырыа айааччылар түмсүүтүн салайааччыта Андрей Терентьевич Замятин «Ийэ барахсан» уонна «Суолабар» диэн истиҥ ырыа буолбут хоһоонноругар видеоклиптары сэргии көрдүбүт-иһиттибит.
Хас биирдии ааптар бэйэтин кинигэтин сөбүлээн, итэҕэйэн таһааттарар кинигэ кыһалаах буолар, ол курдук Марта-Мария үгүс кинигэлэрэ «Офсет» кинигэ кыһатыгар оҥотторон таһааттарар.
Бу ааптарга үөрүүлээх күнүгэр «Офсет» бэрэстэбиитэлэ Мария Владимировна тэрээһиммитигэр кэлэн кыттыһан туран эҕэрдэтин кытта бэлэҕин туттарда.
Эдэр сааһын доҕотторо, оскуолаҕа бииргэ үөрэммит кыргыттара – Светлана Георгиевна, Галина Даниловна, промкомбинатка, быткомбинатка үлэлээбит үөлээннээхтэрэ — Мария Васильевна, Авдотья Никифоровна сылаас-сымнаҕас истиҥ-иһирэх тылларынан эҕэрдэлэрин тиэртилэр.
Бу бэлиэ күн «Эҥсиэли» хаһыат 2026 сыл ыам ыйын 14 күнүнээҕи 18 №-гэр Мария Петровна Мохначевская — Марта-Мариялыын «Хоһоону түргэнник суруйабын, соспоппун» диэн кэпсэтиини таҕыста.
Ити курдук үтүө-мааны күн түмүктэннэ. Мария Петровна өссө да өр кэмҥэ айыылартан аргыстанан, иэйиигэр куустаран – хоһуйа, айа-тута, сөхтөрө тур диэн баҕа санаа бастыҥын этэбит!
