Автор: Ыам ыйын 9 күнэ. Бу күн хас биирдии киһиэхэ улахан суолталаах. 81 сыл анараа өттүгэр Кыайыы былааҕа Рейхстаг үрдүгэр тэлибирии кыыспыта. Түөрт сыл устата тохтоло суох күүдэпчилэммит, элбэх сүтүгү, урусхалы аҕалбыт Аҕа дойду сэриитэ түмүктэммитэ.
Хомойуох иһин, ол уодаһыннаах сыллары эттэринэн-хааннарынан билбит Ытык кырдьаҕастарбыт көҕүрээн иһэллэр. Нам улууһугар сэрии бэтэрээннэрэ суохтар, тыыл бэтэрээннэрэ-33, Чурапчы көһөрүүтүн кыттыылааҕа -1, Ленинград блокадатын кыттыылааҕа-1, сэрии кыттыылааҕын огдообото-1, сэрии оҕолоро-213 хааллылар.
Нам библиотекаларын кииннэммит тиһигин кэлэктиибэ уонна култуура үлэһиттэрин идэлээх сойуустара (председатель Парникова А.А.) Улуу бырааһынньыгы көрсө ытыктыыр бэтэрээннэрбитин эҕэрдэлээн, сэмэй бэлэхтэри туттардыбыт.
Биһиги кэккэбитигэр соҕотох хаалбыт тыыл бэтэрээнэ, 90 саастаах Уваровская Клара Романовна билигин Намҥа улахан кыыһыгар олорор. Клара Романовна 1961 сыллаахха Дьокуускайдааҕы культурнай-сырдатар училищены бүтэрэн баран, Модут библиотекатыгар сэбиэдиссэйинэн ананан үлэлээбитэ. 1967-1975 сс. Түбэ библиотекатыгар бастакы үөрэхтээх специалист быһыытынан үрдүк таһаарыылаахтык үлэлээбитэ. Салгыы 2 Хомустаахха бочуоттаах сынньалаҥҥа тахсыар диэри 20 сыл үлэлээн улууска, республикаҕа библиотечнай дьыала сайдыытыгар дьоһун кылаатын киллэрбитэ. Кини үлэлиир кэмигэр 2 Хомустаах библиотеката куруутун бастыҥнар ортолоругар ааттанар этэ. Ситиһиилээх үлэтин иһин Култуура министиэристибэтин, оройуон Бочуоттаах грамоталарынан наҕараадаламмыта. Клара Романовна 6 оҕо амарах ийэтэ, элбэх сиэн, хос сиэн эйэҕэс эбэтэ буолар.
Убаастыыр бэтэрээннэрбит, сэрии сылын оҕолоро, СӨ, Нам улууһун норуодунай маастара, СӨ култууратын туйгуна, СӨ тыа хаһаайыстыбатын туйгуна, Нам улууһун, Партизан нэһилиэгин бочуоттаах олохтооҕо Оконешникова Марфа Васильевна, үлэ бэтэрээнэ, «Иэйии» бэтэрээннэр уонна «Отуу уота» литературнай түмсүүлэр чилиэннэрэ Попова Варвара Куприяновна олоххо көхтөөх сыһыаннарынан өрүү холобур буолаллар.
Күндү бэтэрээннэрбитигэр баҕарабыт чэгиэн чэбдик доруобуйаны, оҕолоргут, сиэннэргит тапталларыгар бигэнэн этэҥҥэ олороргутугар!
Үйэлэргэ махтал буоллун эһиэхэ, Эйэни аҕалбыт дьоҥҥо!
