25.07.2024

Улуус библиотекалара «Диктант Победы» патриотическай акцияҕа кытыннылар

Россия үрдүнэн уонна атын тас дойдулар кыттыылаах улахан патриотическай акция быйыл 5 төгүлүн муус устар 27 күнүгэр ыытылынна. Бу акция Кыайыы күнүн көрсө Аҕа дойду сэриитин историятын, чахчыларын дьоҥҥо-сэргэҕэ тиэрдиигэ, билиини хаҥатыыга, ыччаты патриотическай тыыҥҥа иитиигэ туһуланар биир сүрүн хайысха буолар.

Нам улууһун үрдүнэн уопсайа 20 былаһаакка тэриллэн, 600-тан тахса киһи кыттыыны ыллылар. Библиотекалар көхтөөх кыттыыны ылан, нэһилиэктэр олохтоохторугар диктант суруйуутун тэрийдилэр.  Ол курдук, Үөдэйгэ, Партизаҥҥа, Аппааныга, Бөтүҥҥэ, Модукка, Түбэҕэ, Таастаахха, Нам киинигэр уопсайа 114 киһи «Диктант Победы» акцияҕа билиилэрин тургуттулар.

Н.М.Рыкунов аатынан улуустааҕы киин библиотекаҕа кыттааччылар тэрээһин иннинэ Россиятааҕы Историческай общество председателэ Сергей Нарышкин видео эҕэрдэтин иһиттилэр. «Нам улууһа” муниципальнай тэриллии депутаттарын сэбиэтин председателэ Алексей Винокуров, Нам улууһун бэтэрээннэрин сэбиэтин председателэ Софья Кобякова Республика күнүнэн эҕэрдэлэрин, кэс тылларын тиэртилэр.

Акцияҕа И.Е.Винокуров аатынан Намнааҕы педагогическай колледж студеннара, культура тэрилтэлэрин үлэһиттэрэ көхтөөхтүк кытыннылар, туоһу суруктары туттулар. Хас биирдии кыттааччы диктант түмүгүн  диктантпобеды.рф сайка киирэн билсиэхтэрин сөп.

Р.Гоголева

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять