27.01.2023

«Отуу уота» өрөгөйдөөх күнэ

Сэтинньи 24 күнүгэр Нам улууһугар сэргэх-истиҥ тэрээһин буолан ааста.  Ол курдук айар дьоҕурдаах доҕотторбут «Отуу уота»  литературнай түмсүү 55 өрөгөйдөөх үбүлүөйдэрин  бэлиэтээн биир идэлээхтэрин, атастарын, доҕотторун, инники күөҥҥэ сылдьар  дьоннорунОтуу уотун” кутаатын тула мустулар.

Тэрээһин күндү ыалдьыттарынан буоллулар: СӨ Суруйааччыларын сойууһун бэрэссэдээтэлэ, нороднай поэта  Иван Мигалкин, СӨ народнай суруйааччылара Павел Харитонов-Ойуку, Наталья Михалева-Сайа, “Полярная звезда” сурунаал кылаабынай редактора Владислав Доллонов, «Күрүлгэн» уус-уран сурунаал сүрүн редактора, суруйааччы Афанасий Гуринов-Арчылан, “Саха сирэ” хаһыат корреспондена, суруйааччы Надежда Егорова-Намылы, Намнааҕы педагогическай колледжы бүтэрбит, учуутал, суруйааччы Василий Гоголев-Уйулҕан, Саха көрдөрөр-иһитиннэрэр хампаанньа үлэһиттэрэ, биир дойдулаахтарбыт Георгий Белоусов, Индира Софронова уонна Борис Гоголев.

Бу күн биир кэрэ түгэнинэн  “Отуу уота” литературнай түмсүү айымньылаахтык айа-тута, суруйа, бичийэ сылдьар доҕотторо Уус-Алдан «Уһуктуу», Хаҥалас «Өлүөнэ долгуннара», Таатта «Иэйии түһүлгэтэ», Мэҥэ Хаҥалас «Таммахтар» литературнай  түмсүүлэр  кэлэн  бэйэлэрин күн баҕа санааларын этэн, эҕэрдэлээн, ыллаан-туойан бардылар.

Суруйааччыларбыт кинигэлэрин хото бэчээттэтэн таһаарар «Офсет» кинигэ кыһатын үлэһиттэрэ Галина Басылайканова-Кэнтик Кыыһа, Айыына Егоровна Старостина эҕэрдэлэрин тиэрдэн туран, үбүлүөйдээх суруйааччыларбытыгар кинигэ таһаартаралларыгар анаан, үөрүүлээх быһыыга сертификаттары, Николай Рыкунов хоһооно бэчээттэммит былааттары туттардылар.

Түмсүүбүт  салайааччыта  Алексей Татаринов-Удьурҕай бэрт сэргэхтик салайа тутан үбүлүөйдээх тэрээһини ыытта. «Отуу уота” литературнай түмсүү бэрэссэдээтэлин солбуйааччыта, СӨ Суруйааччыларын сойууһун чилиэнэ Прасковья Байанаева Николай Рыкунов «Дьахталларга” диэн хоһоонун олус истиҥник ааҕан дьон-сэргэ болҕомтотун тарта.

Бу үөрүүлээх күҥҥэ «Отуу уота» литературнай түмсүүгэ чилиэннэринэн киирдилэр И.Е. Винокуров аатынан Нам педколледж   директора Елена Вячеславовна Никитина уонна библиотекарь идэлээх Христина Константиновна Попова.

Маннык үөрүүлээх бэлиэ күммүтүгэр «Отуу уоттарыгар» элбэх истиҥ тыллаах эҕэрдэлэр этилиннилэр, хомоҕой хоһооннор ааҕылыннылар, ылбаҕай ырыалар ылланнылар. Онтон биһиги Н.М.Рыкунов аатынан киин библиотека үлэһиттэрэ тэҥҥэ үөрэн-көтөн туран, айар куттаах доҕотторбутугар айымньылаах, таһаарыылаах үлэни баҕара хааллыбыт.