27.01.2023

Бэчээт күнэ бэлиэтэннэ

Тохсунньу 19 күнүгэр  Н.М.Рыкунов аатынан  киин библиотека конференциялыыр  саалатыгар Россия бэчээтин күнүн чэрчитинэн  “Эҥсиэли” хаһыат коллектива 2022 сыллаах үлэтин түмүктэрин таһаарар дьоро күнү бэлиэтээтэ. Сыл аайы буолар тэрээһин быйыл 35-һис төгүлүн ыытылынна! Бу күн общественнай корреспонденнар, редакция ветераннара муһуннулар. Бэчээт үлэһиттэригэр анаан библиотека фондатыттан «Старых книг забытые страницы…» диэн кинигэ быыстапката туруоруллунна.

Кылаабынай редактор Лена Алексеевна Ноговицына  сыллааҕы үлэ түмүктэрин, ситиһиилэри, инники былааннары сырдатта. Үөрүүлээх быһыыга-майгыга үгэс буолбут бастыҥ общественнай корреспонденнарга анал номинациялары туттарда.

Библиотека коллектива улууспут баар суох хаһыатын кытта ыкса ситимнээхтик үлэлиир. Ону бэлиэтээн туран, директор Софронова Майя Романовнаҕа Махтал сурук туттарылынна. Методическай отдел сэбиэдиссэйэ Гоголева Раиса Алексеевна  “Эҥсиэли” хаһыаты кытта бииргэ үлэлэһэрин, сонуннары суруйарын иһин эмиэ Махтал суругунан бэлиэтэннэ.

Күндү доҕотторбутугар, “Эҥсиэли” хаһыат коллективыгар, үүммүт саҥа сылга өссө үрдүк ситиһиилэри, сонунтан сонун суруйуулары, улууспут олоҕо-дьаһаҕа тупсарын туһугар сыралаах үлэҕит үтүө түмүктэрдээх буоларыгар, иллээх-эйэлээх олоҕу баҕарабыт!