Автор: 
От ыйын 10 күнүгэр Н.Рыкунов аатынан киин библиотекаҕа СӨ үөрэҕириитин туйгуна, оҕону иитиигэ өр сыллаах ситиһиилээх үлэтин иһин Арассыыйатааҕы Бочуот, Милосердия уордьаннарын кавалера, Россия президенин үөрэх салаатыгар Судаарыстыбаннай, СӨ Ийэҕэ үрдүкү махтал, «Кыһалҕалаах оҕолор туруктаах буолууларыгар үрдүк ситиһиилэрин иһин» Өксөкүлээх Өлөксөй аатынан Судаарыстыбаннай бириэмийэлэр лауреата, “Гражданскай килбиэн” бэлиэ хаһаайына, Почетный старейшина РС(Я), Нам улууһун бочуоттаах олохтооҕо, улуустааҕы “Отуу уота” литературнай түмсүү кыттыылааҕа Клара Иннокентьевна Матвеева-Эйгэ Мичээрэ “Кэрэ сипсиэрэ” диэн бастакы сырдык куттаах хоһооннорун хомуурунньугун сүрэхтиир дьоро күнэ буолла.
Эйгэ Мичээрэ эдэрдии сэргэх-чобуо тыллаах, чэбдик ыраас тыыннаах, уран-нарын сурааһыннардаах, дохсун долгун тэтимнээх хомоҕой хоһооннордоох кинигэтэ 100 ахсаанынан, 124 сирэйинэн быйыл “Дани-Алмас” кинигэ кыһатыгар бэчээттэнэн тахсыбыт. Кинигэ киирии тылын кинигэ эрэдээктэрэ Надежда Васильевна Андросова суруйбут. Хоһоон хомуурунньугар ааптар төрөөбүт дойдутун, айылҕа биллэ-биллибэт хамсааныһыттан саҕалаан, бары көстүүлэрин, дьыл кэмнэрин уратыларын о.д.а. чаҕылхайдык ойуулаабыт 146 хоһооно киирбиттэр. Үөрүүлээх дьоро күҥҥэ эҕэрдэлэрин тиэртилэр «Нам улууһа» МТ баһылыгын солбуйааччыта Филипп Васильевич Николаев, “Ленскэй нэһилиэк” МТ баһылыгын солбуйааччыта Тимофей Егорович Тимофеев, Нам улууҺун култуураҕа уонна духуобунай сайдыыга управлениетын начальнига Семен Прокопьевич Ядрихинскай, улуустааҕы дьиэ кэргэн уонна ыччат политикатын отделын салайааччыта Екатерина Сергеевна Евстафьева, оҕону иитэр дьиэ – кэргэн ассоциациятын чилиэнэ Матрена Гаврильевна Филиппова, олохтоох «Эҥсиэли» хаһыат редактора Дарина Константинова. “Отуу уоттарыгар” өссө биир хоһоон хомуурунньуга эбиллибитинэн истиҥ эҕэрдэлэрин тиэртилэр, ааптар хоһоонноруттан иэйиилээхтик аахтылар Алексей Татаринов-Удьурҕай салайааччылаах “Отуу уота” литературнай түмсүү. «Тыалтан, хаартан чаҕыйбат, куйаастан да куттаммат” – Розалия Черкашина салайааччылаах «Хардыы» хаалыктаах хаамыы бөлөх эҕэрдэлэрин тиэрдэн туран, хардыыларга анаммыт өрөгөй ырыатын өрө көтөҕүллэн ыллаан иһитиннэрдилэр. Бу түмсүү кыттыылааҕа Мария Гаврильевна Жиркова «Таммахатар” диэн ырыанан эҕэрдэлээтэ. Ити курдук саҥа тахсыбыт кинигэбит биһирэмэ олус сэргэхтик, истиҥник, иһирэхтик буолан ааста.
