Улууспутугар үөрэҕирии 155 сылын көрсө үөрэх тэрилтэлэрин эр дьонун икки ардыларыгар  VI «Дорҕоон түһүлгэтэ»

Эркин курдук эрэнэр эр дьоммут,

                   Чөллөркөй күөмэйдэрин көҥкөтөн

       Ааҕыы күрэҕэр кыттаннар

                                      Дьиҥнээх «Дорҕоон түһүлгэтин” түстээтилэр.

Е. Лукинова-Сэргээнэ

Олунньу 25 күнүгэр Н. М. Рыкунов аатынан киин модельнай библиотека ааҕар саалатыгар төрөөбүт төрүт тыл, сурук-бичик күнүгэр анаммыт тэрээһиннэр чэрчилэринэн үгэс буолбут VI «Дорҕоон түһүлгэтэ» сахалыы уус-уран ааҕыы күөн күрэс тэрээһин буолан ааста.

Дорҕоон түһүлгэтэ биэс сыл устата үгүс эр дьону түмэ тардан ыытыллан кэллэ. Ол курдук бу бырайыак сүрүн сыала эр дьон оруолун киэҥ эйгэҕэ таһаарыы, саха уус-уран  айымньытын бары көрүҥэр эр дьон болҕомтотун тардыы, сахалыы ааҕыыны көҕүлээһин буолар.  Быйылгы  VI төгүлүн ыытыллар «Дорҕоон түһүлгэтэ» улууспутугар үөрэҕирии 155 сылын көрсө үөрэх тэрилтэлэрин эр дьонун икки ардыларыгар  ананан ыытыллынна.

Бу күн ааҕар саалаҕа улууспут үөрэх тэрилтэлэрин 8 толуу эр дьоно муһуннулар :

1. Сивцев Василий Николаевич, В.П. Артаманов аатынан Хамаҕатта саха французскай лиссиэйин саха тылын уонна литературатын учуутала
2. Степанов Тимофей Андреевич, Нам 2 №-дээх орто оскуолатын технологияҕа учуутала.
3. Алексеев Айаал Ньургунович, М. К. Аммосов аатынан Хатырык орто оскуолатын физическай культура учуутала.
4. Петров Владимир Васильевич, И.С. Гаврильев аатынан 1 №-дээх орто оскуолатын АХЧ-га дириэктэри солбуйааччы.
5. Иванов Ариан Валентинович, Нам улууһун үөрэх салалтатын оҕо спордун киинин специалиһа.
6. Ноев Василий Иванович, Хатыҥ-Арыытааҕы «Сандаара» оҕо уһуйаанын физическай культураҕа инструктора.
7. Винокуров Тимофей Прокопьевич,  Е.С. Сивцев-Таллан Бүрэ аатынан Бөтүҥ орто оскуолатын педагог-психолога.
8. Лукин Андрей Валерьевич, И. Е. Винокуров аатынан Хатыҥ-Арыы орто оскуолатын технология учуутала.

Үөрүүлээх тэрээһиҥҥэ киирии тылы эттэ Нам улууһун културатын уонна духуобунай сайдыытын управлениятын салайааччыта Семен Прокопьевич Ядрихинскай. Истиҥ тэрээһиммитин  тойугунан киэргэтэн, өрө көтөҕөн биэрдэ П. П. Ядрихинскай – Бэдьээлэ аатынан Олоҥхо дьиэтин үлэһитэ Туйаара Ушканова.

Күрэхпитин кыраҕытык кэтээн, истэн дьүүллүүр сүбэ көрдө:

• Мохначевская Марта Мария– СӨ суруйааччыларын союһун чилиэнэ, Нам ууһун “Отуу уота” литературнай түмсүү чилиэнэ, 30 кинигэ ааптара, хоһоон айааччы, тылбаасчыт.
• Новиков Иван Степанович– А.Ф. Шестаков аатынан норуот айымньытын дьиэтин режиссера, СӨ культуратын туйгуна.
• Поротова Светлана Спартаковна– Нам улууһун үөрэх салалтатын салайааччытын солбуйааччыта.

Күрэхпит 3 түһүмэҕинэн ааста:

1. Проза (кэпсээн);
2. Поэзия (хоһоон);
3. Аман өс (кыттааччы бэриллибит тиэмэҕэ 5 мүнүүтэҕэ санаатын биэрэн кэпсиир).

Толору  эркин курдук эрэнэр эр дьоммут мустан саха литературатын көмүс фондатыгар киирбит айымньылартан ааҕан добдугуратан барбыттара көрүөххэ, истиэххэ бэрт үчүгэйэ.   

Кыттааччылар биирдии-биирдии тахсан талан ылбыт тиэкистэрин, хоһооннорун уустаан-ураннаан аахтылар, үһүс түһүмэххэ бэриллибит тиэмэлэрин  ол курдук : «Төрүт тыл», «Таптал, дьиэ кэргэн», «Үөрэх, билии», «Доҕор, атас», «Сиэр-туом, итэҕэл», «Чөл турук» тутатына толору арыйан, санааларын түмэн, тылларын чочуйан, ситимнээн кэпсээн, өрө көтөҕүллэн, сахалыы саҥанан салгыны хамсатан, өйү-санааны уһугуннаран дьүүллүүр сүбэ болҕомтотун тартылар. 

  Түмүгэр кыайыы өрөгөйүн ыллылар :

I Үрдэл — Сивцев Василий Николаевич

II Үрдэл — Ноев Василий Иванович

III Үрдэл — Винокуров Тимофей Прокопьевич

Онон алтыс төгүлүн ыытыллыбыт улуустааҕы «Дорҕоон түһүлгэтэ» сахалыы уус-уран ааҕыы күөн-күрэс үөрэх тэрилтэлэрин эр дьонун ортолоругар бэрт сэргэхтик уонна истиҥник буолан ааста.

Кыттааччыларбытыгар, дурда-хахха, биһигини көрө-истэ сылдьар эр хоһууннарбытыгар, тэрээһиммитигэр көмөлөспүт дьоммутугар улахан махталбытын тиэрдэбит.

Сырдык санаанан салайтаран туппуккут тубустун, айбыккыт айхалланнын, айыыларгыт арчылыы-араҥаччылыы сырыттыннар диэн баҕа санаабытын тиэрдэбит!