Автор: Үрүҥ Тунах ыһыах…
Үрдүбүтүнэн көтөр лыах,
Үрүмэччи курдук дайыах,
Үрүҥ күннүү сыдьаайыах!
Үрүҥ Айыы сылыгар, Үрүҥ Айыы ыйыгар , о.э. бэс ыйын 5 күнүгэр Эҥсиэли хочотун Нам сэлиэнньэтигэр аар айылҕа ситэн, тупсан турар кэмигэр Саха Өрөспүүбүлүкэтигэр култуура сылын чэрчитинэн аан бастакытын «Отуу уота» литературнай, «Туллук хаара» мелодистар уонна баянистар түмсүүлэрин «КЭРЭ ЭЙГЭ ТҮҺҮЛГЭТЭ» диэн Үрүҥ Тунах ыһыаҕа олус сэргэхтик, үрдүк таһымнаахтык буолан ааста.
Саха үгэһин сиэринэн Прасковья Дмитриевна Байанаева алгыһынан ыһыах саҕаланна, бука бары кэлбит дьон үөрэн-көтөн, сүргэбит көтөҕүллэн арчыланныбыт, ыраастанныбыт, баҕа санааларбытын Куйаарга ыыттыбыт.
Үөрүүлээх чааһы култуура салаатын үлэһиттэрэ Ирина Винокурова уонна Матрёна Платонова иилээн-саҕалаан ыыттылар. Эҕэрдэ тылы улуус аҕа баһылыгын солбуйааччыта Вячеслав Юрьевич Дьяконов, улуус бэтэрээннэрин сэбиэтин бэрэссэдээтэлэ Алексей Иванович Винокуров, «Отуу уота», «Туллук хаара» түмсүүлэрин салайааччылара Алексей Михайлович Татаринов-Удьурҕай, Андрей Терентьевич Замятин эттилэр. Алексей Михайлович Татаринов-Удьурҕай эҕэрдэ суругунан, «За вклад в развитие культуры Намского улуса» почетнай знагынан, Зинаида Васильевна Нератова-Тупсууна «Ветеран художественной самодеятельности Республики Саха (Якутия)» бэлиэлэринэн, Андрей Терентьевич Замятин эҕэрдэ суругунан наҕараадаланнылар. Ол кэнниттэн оһуохайы оройуттан туттубут, эһиэхэйи эҥэриттэн тэллибит, уопсай хаартыскаҕа түһэн, кэрэ түгэни үйэтиттибит, толору астаах сандалы тула олорон, түһүлгэлээн аһаатыбыт.
Ыһыах, биллэн турар, күрэстэрдээх буолар, ол курдук «Ыһыах маанылаах аһа» (кыайыылаахтарынан 1 миэстэҕэ- I Хомустаах нэһилиэгиттэн Айталина, Виктор Рожиннар дьиэ кэргэттэрэ, 2-Мария Мохначевская-Марта-Мария, 3-Татьяна Гаврильева буоллулар), «Саха маанылаах таҥаһа» (дьахталларга 1 миэстэ-Клара Матвеева-Эйгэ Мичээрэ, 2-Варвара Попова-Талаһалаах кыыһа, 3-Анна Хабарова-Айталы, эр дьоҥҥо 1миэстэҕэ- Григорий Эверстов-Тыыппалаах, 2-Николай Протопопов, 3-Анатолий Софронов-Онтуон буоллулар), «Сонун оонньуулар» күрэстэр ыытылыннылар, көхтөөхтүк кыттыбыт дьон бириистэргэ тигистилэр.
Корнхол күрэҕин олус сонурҕаан, бука бары наһаа көхтөөхтүк кыттан, илин-кэлин түсүһэн, бириистээх миэстэлэргэ тигистилэр: дьахталларга 1 миэстэҕэ-Матрёна Платонова, 2-Мария Мохначевская-Марта-Мария, 3-Анна Сивцева-Туймаада, эр дьоҥҥо 1 миэстэҕэ-Николай Протопопов, 2-Афанасий Татаринов, 3-Илья Новиков.
Ох саанан ытыы күрэҕэр 1 миэстэҕэ-Афанасий Иванов, 2-Алексей Татаринов-Удьурҕай, 3-Надежда Азарова -Алаас Илгэ үөрүү өрөгөйүн биллилэр.
Үрүҥ Тунах ыһыахпыт «Сайыны уруйдаан» эҕэрдэ кэнсиэринэн түмүктэннэ. Кэнсиэри ылбаҕай ырыаларынан Никольскайтан «Намыына», Аппааныттан «Эйээрэр» ырыа бөлөхтөрө, Андрей Замятин, Андрей Старков, Николай Гоголев, Дьол Сандаара, Афанасий Иванов, Алексей Дьячковскай, Афанасий Татаринов, Алексей Татаринов-Удьурҕай, Николай Протопопов, Ирина Винокурова, Николай Уаров, Мария Григорьева-Маайа киэргэттилэр.
Нам улууһун айар куттаах дьонун-сэргэтин бастакы Үрүҥ Тунах ыһыаҕа санаа хоту ааста, аны иккилии сыл буола-буола маннык түһүлгэ төрүттэниэҕэ. Бүгүҥҥү күнтэн үөрбүттүү үрүҥ күммүт сандаара чаҕылыйа тыкта, биир эйгэлээх дьону өссө күүскэ сомоҕолоото, аар айылҕа өссө да кэлээриҥ диэбиттии атаара хаалла.
Быйылгы ыһыаҕы ыытарга этии киллэрбит Андрей Терентьевичка уонна бары тэрийээччилэргэ барҕа махталбытын тиэрдэбит!
«Отуу уота» лит.түмсүү пресс-киинэ
