Автор: 
Биллиилээх государственнай уонна политическай деятель, намнар киэн туттар биир дойдулаахпыт Винокуров Илья Егорович быйыл, 2026 сылга төрөөбүтэ 130 сылын бэлиэтиибит. Нам улууһун Аҕа баһылыга Слепцов Юрий Иннокентьевич дьаһалынан улууспутугар Илья Винокуров сыла биллэрилиннэ.
Олунньу 25 күнүгэр Н.М.Рыкунов аат. киин библиотека үлэһиттэрэ Намнааҕы И.Е. Винокуров аат. педагогическай колледж студеннарыгар “Илья Винокуров-саха норуотун чулуу уола” диэн медиаурок ыыттыбыт. Студеннарга батараактан ССКП уобаластааҕы комитетын бастакы секретарыгар (билиҥҥинэн республика үрдүкү салайааччыта, Ил Дархаҥҥа тэҥнээх) тиийэ үүммүт, тыыннааҕына саха дьонугар уостан түспэт номох буолбут киһи Илья Егорович Винокуров түһүүлээх-тахсыылаах уустук олоҕун, үгүс үтүмэн үлэтин сырдаттыбыт. Ол курдук, сэрии сылларыгар биир дойдулаахтарын хоргуйууттан быыһаабытын, үс бастакы суруйааччыларбытын А.Е. Кулаковскай-Өксөкүлээх Өлөксөй, А.И. Софронов-Алампа, Н.Д. Неустроев саха урукку ыар олоҕун дьиҥнээхтик көрдөрөн суруйбут айымньыларын карьераттан аккаастанан көмүскээбитин, доруобуйа харыстабылыгар, наука сайдыытыгар сүҥкэн үлэни ыыппытын, «Тэпсиллибэт үтүө аат» И.Е. Винокуров туһунан биллиилээх дьоммут эппит этиилэрин, үтүө киһи аата үйэлэргэ, диэн туох үйэтитии үлэтэ ыытыллыбытын, библиотека сайтыгар И.Е.Винокуровка аналлаах “Наследие Винокурова” электроннай медиаресурс туһунан сиһилии билиһиннэрдибит.
Ити курдук билиҥҥи эдэр көлүөнэ дьон, республика салалтатыгар саҥа үүнэн эрэр эдэр салайааччылар И.Е.Винокуров курдук Саха сирин сайдыытыгар сүҥкэн кылааттарын киллэрбит үтүө дьоммут тустарынан билиэхтээхтэр, кинилэр ааттарын киэн тутта, сүгүрүйэ ааттыахтаахтар.
