02.03.2021

Тыа библиотеката хайдах олордугут?

Бу ааспыт 2020 сыл араас элбэх саҥаны, сонуну ону тэҥэ ыарахаттары да көрүһүннэрдэ, элбэххэ да уерэттэ…

М.А.Охлопкова аат. Хатырык модельнай библиотеката, 2020 с үлэтин түмүктээн, саҥа үлэ сылыгар эрэллээхтик үктэннэ.

2020 с.ахсынньы ый 4 күнүгэр биир дойдулаахпыт тыыл,үлэ бэтэрээнэ, Нам улууһун бочуоттаах олохтооҕо, РФ суруналыыстарын Сойууһун чилиэнэ,СӨ Ытык Аҕата Николай Иванович Сивцев төрөөбүтэ 90 сылын көрсө кэргэнэ Дьоруой ийэ Елизавета Васильевна Сивцева уонна оҕолоро (кинигэҕэ киирбит матырыйааллары хомуйда кыыһа Сардаана Николаевна Кривошапкина) таһааттарбыт»Олохпун норуоппар анаабытым»диэн кинигэтин сүрэхтэниитэ Судаарыстыбаннас түмэлин киэҥ уораҕайыгар буолан ааста. Кинигэҕэ сүрүн миэстэни хаһаайыстыбаннай, советскай, партийнай үлэһит, Россия суруналыыстарын Сойууһун чилиэнэ Н.И.Сивцев Нам улууһун «Ленин суола», кэлин «Эҥсиэли» хаһыаттарга таһаарбыт ыстатыйалара ылаллар. Ону таһынан кини чиэһинэйин, көнө суолу тутуһан үлэлээбитин, киһи быһыытынан эҥкилэ суоҕун бэлиэтээн суруллубут чугас дьонун, үөлээннээхтэрин ахтыылара киирдилэр.

Ахсынньы 22 күнүгэр уһулуччулаах советскай государственнай уонна партийнай үлэһит, Сибииргэ Сэбиэскэй былааһы олохтуур иһин охсуһуу кыттыылааҕа, Саха АССР тэриллиитин историятыгар сүдү суолталаах киһибит, Саха сирэ бүттүүнүн киэн туттуута, биир дойдулаахпыт Максим Кирович Аммосов төрөөбүтэ 123 сылын туолла . Бу бэлиэ даатаны көрсө, Максим Аммосов сиэн балта Яна Егоровна Корякина көҕүлээһининэн, Саха Государственнаһын историятын түмэлэ  уонна М.А.Охлопкова аатын сүгэр Хатырык модельнай библиотеката бэлэмнээбит сериялаах видео- уруоктарын таһаардыбыт.
Саха норуотун Чулуу уола Максим Аммосов чаҕылхай олоҕун сэһэргиир сериялаах видео-уруоктар кэлэр көлүөнэ ыччат дьоҥҥо анаан, ааҕааччы киэҥ араҥатыгар туһаайыллан норуот бүттүүн киэн туттар киһитин сырдык аатын үйэтитэр, куйаар ситимин нөҥүө тарҕатар сыаллаах оҥоһуллан, Максим Аммосов тереебут кунун керсе Нам орто оскуолатын уерэнээччилэригэр кердеруллубутэ.
“…Историк учуонай Петров Д.Д. чинчийээһининэн, Бершетькэ 3000 кэриҥэ саха дьоно түмүллүбүт. Кинилэри 4 хайыһар (19, 20,21, 22-с) биригээдэлэригэр тарҕаталаабыттар. Бу лааҕырга 19-с биригээдэҕэ Сунтаар, Ньурба, Үөһээ Бүлүү, Горнай, Чурапчы, Таатта, Өлүөхүмэ оройуоннарыттан элбэх киһи, арыый аҕыйах соҕус Бүлүү, Мэҥэ-Хаҥалас, бэрт аҕыйах Дьокуускай, Ленскэй, Нам, Уус-Алдан, Хаҥалас оройуоннарын дьоно түбэспиттэр”.
Бу күн, ахсынньы 22 күнүгэр Ньурба улууһунТүмүк нэһилиэгин бочуоттаах олохтооҕо,
кыраайы үөрэтээччиК.В. Васильев “ИЛЬМЕНЬ КҮӨЛГЭ” диэн саҥа кинигэтин сүрэхтэниитэ куйаар ситимигэр ZOOM платформаҕа ыытылынна, онно биһиги библиотека  кыттан, биир дойдулаахпыт, Аҕа Дойду сэриитин бэтэрээнэ, Ильмень күөлгэ кыргыһыы кыттыылааҕа Дмитрий Егорович Корякин олорон ааспыт олоҕун туһунан, Дмитрий Егорович төрөөбүтэ 100 сылын көрсө оҕолоро таһааттарбыт кинигэлэрин билиһиннэрэн,библиотека  сэбиэдиссэйэ Ульяна Николаевна кэпсээтэ.

Онон, Хатырыктар, кэлбит 2021 сылга бэт сэргэхтик, элбэх саҥа былааннардаах, улахан эрэллээх үктэннибит, бу сылга биһиги библиотекабыт 75 сылын, М.А.Охлопкова төрөөбүтэ 90 сааһын бэлиэтиэхпит.

Кэлбит сыл үтүө түмүктэрдээх, киэн далааһыннаах буоллун!

М.А.Охлопкова аат.Хатырык модельнай библиотеката