Автор: Бу дьыл ахсынньы 16 күнүгэр күндүтүк саныыр ветераммыт, 40 сыл эҥкилэ суох Оҕо библиотекатыгар үлэлээбит үлэ ветерана, ССРС культуратын туйгуна, СР бочуоттаах ветерана, Нам улууһун «Ытык саас” бэлиэ хаһаайына, Ленскэй нэһилиэк бочуоттаах олохтооҕо Эверстова Анастасия Гаврильевна ыарахан ыарыыттан олохтон туораата.
Эверстова Анастасия Гаврильевна 1938 сыллаахха сэтинньи 27 күнүгэр Нам оройуонун Бөтүҥ нэһилиэгэрколхозтаах кэргэҥҥэ төрөөбүтэ.
Бөтүҥ 7 кылаастаах оскуолатын1954 сыллаахха бүтэрбитэ, салгыы Нам орто оскуолатыгар үөрэнэн 1958сылга 10-с кылааһы бүтэрэн, комсомол путевкатынан 2,5 сыл Бөтүҥҥэ ньирэй көрөөччүнэн, кулууп сэбиэдиссэйинэн үлэлээбитэ.
1961 с. Дьокуускайдааҕы культурнай-сырдатар училищеҕа үөрэххэ киирбитэ. 1963 с. бүтэрэн, Үөдэй оскуолатыгар учууталынан үлэлээбит. Онтон Намҥа 1964с. тохсунньу ыйтан Оҕо библиотекатыгар ааҕар саала сэбиэдиссэйинэн ананан үлэлиир уонна бочуоттаах сынньалаҥҥа барыар диэри 34 сыл таһаарыылаахтык үлэлээбитэ. Анастасия Гаврильевна эйэҕэс, холку майгылааҕын иһин оҕолор олус сөбүлүүллэрэ, хас биирдии кырачаан ааҕааччыга болҕомтолоохтук сыһыаннаһара, ааҕар кинигэлэрин булан, сүбэлии-амалыы сылдьара. Кини салайыытынан маассабай үлэни бэлэмнээһин, суруйааччылар үбүлүөйдээх дааталарын бэлиэтээһин буолара. Кини ити үлэтин кэрэхсэбиллээхтик тэрийэн, сценарийын уустаан — ураннаан суруйан ыытара. Саҥа дьыллааҕы утренниктары, кинигэ нэдиэлэтин бырааһынньыгын уо.д.а үгүс тэрээһиннэри дууһатын ууран туран, айымньылаахтык ыытара. Уруһуйдуур дьоҕурдаах буолан, быыстапкалар ааттарын, паапкалары, альбомнары, плакаттары, стендэлэри суруйан, уруһуйдаан оҥороро. Анастасия Гаврильевна төһө да уустук, ыарахан кэмҥэ үлэлээтэр, идэтигэр олус бэриниилээҕэ, оҕо ааҕыытын көҕүлээччи, тэрийээччи специалист быһыытынан өрүү холобурга сылдьара.
Үлэлээбит сылларын устатыгар мэлдьи общественнай үлэҕэ активнайдык кыттара. Ол курдук профсоюз месткомун чилиэнинэн, народнай контроль чилиэнинэн, ветераннар советтарыгар секретарынан, быыбар комиссиятыгар өр сылларга үлэлээбитэ.
Оҕолоро оскуолаҕа үөрэнэр кэмнэригэр мэлдьи родтройкаҕа, родкомитет чилиэнинэн сылдьыбыта.
Анастасия Гаврильевна 4 оҕо тапталлаах ийэтэ, элбэх сиэн, хос сиэн эйэҕэс эбээтэ буолан уһун дьоллоох олоҕу олорон ааста…
Өр сыллаах үлэтэ сыаналанан, Нам райисполкомун Почетнай грамоталарынан, РСФСР Культуратын Министерствотын Почетнай грамотатынан, СССР Культуратын Министерствотын «За отличную работу” значогунан наҕараадаламмыта.
Ытыктыыр, убаастыыр киһибит, тетя Настя, Анастасия Гаврильевна үлэлээбит, олорбут дьоһун олоҕо эдэр көлүөнэ библиотекардарга өрүү холобур буолуоҕа, кини сырдык мөссүөнүн мэлдьи ахта-саныы сылдьыахпыт.
Намнааҕы кииннэммит библиотечнай ситим коллектива
