Автор: Бүтүн Арассыыйатааҕы “Библионочь-2025” аахсыйатын чэрчитинэн Дойду уонна ДНР Дьоруойа Сунтаар Уһун Күөлүттэн төрүттээх Дмитрий Егоров-Сунтаар төрөөбүтэ 50 сылыгар итиэннэ Чурапчы Мырылатыттан төрүттээх, кэлин Намҥа олорон үлэлээбит-хамсаабыт хорсун байыас, “Эр санаа” уордьан кавалера Николай Романов-Ронины кытары дьиҥнээх бойобуой доҕордоһууларыгар анаммыт “Бойобуой доҕордоһуу чаҕылхай туоһулара…” диэн документальнай сэһэн кинигэ сүрэхтэниитэ буолла.
Бу тэрээһиммитигэр Николай Николаевиһы кытта бииргэ үлэлээбит, алтыспыт дьоно-сэргэтэ, доҕотторо кэлэн истиҥ иһирэх тылларынан ахтан-санаан, кинигэ тула кэпсэтэн, санааларын атастаһан ыллылар. Кинигэ 1000 ахсаанынан, 128 сирэйинэн “Офсет” кинигэ кыһатыгар быйыл бэчээттэнэн тахсыбыт. Кинигэ ааптара Дмитрий Егоров биир дойдулааҕа Эдуард Данилович Еремеев.
Тэрээһиммитигэр ыалдьыттарынан буоллулар Дьоруой Дмитрий Егоров бииргэ төрөөбүт убайа Республиканскай оперативнай штаб координационнай киин республиканскай комиссиятын “Вместе к Победе!” киинин үлэһитэ Алексей Николаевич Егоров, Николай Романов бииргэ төрөөбүт эдьиийэ Лена Николаевна Ильина, олоҕун доҕоро Ньургуйаана Герасимовна Романова. «Нам улууһа» муниципальнай оройуон баһылыгын экономикаҕа уонна үпкэ солбуйааччыта Екатерина Прокопьевна Саввинова, “Нам улууһа” муниципальнай оройуон Улуус депутаттарын Сэбиэтин председателэ Алексей Иванович Винокуров. Лена Николаевна быраатыгар анаан суруйбут ырыатын кэлбит ыалдьыттар уйадыйа иһиттилэр.
Иван Гаврильев аатынан бастакы нүөмэрдээх орто оскуолатын “Күндүл” литературнай-театральнай коллектив бөлөҕүн толоруутугар «Махтал саллаакка» хоһоону аахтылар, салайааччы Лариса Дмитриевна Данилова. Коля уһуйааҥҥа сылдьан таптаан аахпыт хоһоонун Агния Барто “Синяя юбочка” хоһоону аахтылар Илья Чаҕылҕан аатынан алын сүһүөх оскуола 3-с кылааһын үөрэнээччилэрэ, салайааччы Кириллина Ольга Михайловна. Онтон алын кылааска үөрэнэ сылдьан сөбүлээн аахпыт үгэтин «Саахырымсах сахсырҕаны» толордулар бииргэ төрөөбүттэр Илья Чаҕылҕан аатынан алын сүһүөх оскуолатын 3-с кылааһын үөрэнээччитэ Филипп Неустроев уонна Иван Гаврильев аатынан бастакы нүөмэрдээх оскуолатын 2-с кылааһын үҕрэнээччитэ Артур Неустроев, салайааччы Михайлова Марианна Николаевна.
Сунтаар улууһуттан Дмитрий Егоров аҕата Николай Алексеевич Егоров уонна кинигэбит ааптара Эдуард Данилович Еремеев быһа холбонон кэлбит ыалдьыттарга кинигэ туһунан сиһилии билиһиннэрдилэр.
«Суруллубут суоруллубат» диэн мээнэҕэ эппэттэр. Тыл эппит дьоммут саҥа тахсыбыт кинигэ ааҕааччыларын булан, эдэр ыччаппытын Ийэ дойдуга бэриниилээх буоларга, доҕордуу сыһыаҥҥа, патриотическай тыыҥҥа иитиигэ төһүү күүс буоларын бэлиэтээн эттилэр. Сэриигэ уһаарыллыбыт доҕордоһуу. Иккиэн билигин суохтар, ыар сэрии кинилэр сырдык тыыннарын айылҕа биэрбит кэминээҕэр быдан эрдэ илдьэ бардаҕа. Бу икки боростуой саллааттар остуоруйаҕа кэпсэнэрин курдук сир уолаттара этилэрэ, киһи кыайбатаҕын кыайбыттара, киһи сатаабатаҕын оҥорбуттара. Биһиги хорсун санаалаах байыастарбыт Николай Романов-Ронин, Дмитрий Егоров-Сунтаар албан ааттара үйэлэргэ ааттана, ахтылла, үйэтитиллэ туруохтара.
