Автор: Бэс ыйын 10 күнүгэр Н.Рыкунов аатынан киин библиотекаҕа талааннаах хормейстер, ССРС культуратын туйгуна, СӨ култууратын үтүөлээх үлэһитэ Елена Александровна Кутукова олоҕун туһунан бэйэтин суруйуута, ыстатыйалара, үөлээннээхтэрин ахтыылара түмүллүбүт “Дьолум — үлэбэр” диэн дьоһун саҥа тахсыбыт кинигэтин биһирэмэ буолан ааста.
«Ырыа кини дьылҕата,
Кыайа туппут эйгэтэ!
Кэрэ баарын кэпсээбит,
Бэлэх ууммут бар дьоҥҥо!” – диэн Полина Победа хоһоонугар хоһуйбутун курдук Елена Александровна сөбүлүүр идэтигэр таба тайанан, ырыа куттаах культура эйгэтигэр 51-с сылын үлэлээн кэллэ. Кинигэ 70 ахсаанынан, 148 сирэйинэн быйыл Дани-Алмас кинигэ кыһатыгар бэчээттэнэн тахсыбыт. Кинигэни хомуйан оҥорбуттар Елена Александровна уонна биһиги библиотекабыт кылаабынай библиограба Анастасия Степановна Колпашникова. Кинигэ аан тылын суруйбут Нам улууһун “Туллук хаара” ырыа айааччылар түмсүүтүн салайааччыта Андрей Замятин. Тэрээһиҥҥэ эҕэрдэ тылларын тиэртилэр «Нам улууһа» МТ баһылыгын солбуйааччыта Юрий Вячеславович Дьяконов, Өрөспүүбүлүкэҕэ норуот айымньытын сайдыытын салайбыт, СӨ ырыа айааччыларын сойуустарын чилиэнэ Саргылана Саввична Адамова-Алтан Кыыс, Елена Александровнаны кытта культпросвет училищеҕа, Хабаровскайдааҕы культура институтугар бииргэ үөрэммит дьүөгэтэ Альбина Герасимовна Иванова ону тэҥэ оҕо сааһын дьүөгэлэрэ, бииргэ үлэлиир коллегалара, «Дьүөгэлэр» народнай вокальнай, “Нарыйаана” вокальнай ансамбыллара ону сэргэ “Ньургуһун” норуодунай хора.
