26.07.2024

ХАҺЫАТЫ КЫТТА НЭДИЭЛЭ УСТАТА

 Бу дьыл алтынньы 5 күнүгэр хаһыаппыт тэриллибитэ 85 сылын туолла. Сыстыганнаах  ыарыынан хааччахтыыр миэрэлэр олохтонон, үбүлүөйдээх сыл төһө да дирбиэнэ-дарбаана суох бардар, хас нэһилиэк аайы улууспут хаһыатыгар сыһыаннаах тэрээһиннэр ыытылыннылар. Онуоха биһиэхэ улахан көмөнү, өйөбүлү Намнааҕы кииннэммит библиотека ситимэ,  А. Шестаков аатынан культура дьиэтэ  оҥордулар.

Ол курдук, хаһыат тэриллибит күнүн баттаһа, алтынньы 5 күнүттэн 10 күнүгэр диэри, кииннэммит библиотека ситимэ бары филиалларыгар «Эҥсиэлилиин бииргэ» диэн ааҕааччыларга анаан нэдиэлэ былааннаан ыытта. “Эҥсиэли”  хаһыат историятын төһө билэҕин?” тургутук ыйытыктар, “Саһарбыт страницалар тугу кэпсииллэр” информация күннэрэ, нэһилиэк общественнай корреспонденнарын сырдатыы, хаартыска күрэхтэрэ, акциялар куйаар ситимин нөҥүө ыытылыннылар. Холобура, Хатырык модельнай библиотеката алтынньы 8 күнүгэр киэһэ 20 чаастан “Эҥсиэли”  хаһыат кылаабынай редактора Владислав Касьяновы кытта библиотека инстаграм сирэйигэр аһаҕас эфир  ыыппыта. Биһиги бу тэрээһиннэри төһө кыалларынан кэтээн көрдүбүт уонна  улууспут дьоно-сэргэтэ, ааҕааччылар көхтөөх кыттыыны ылбыттарын бэлиэтиибит.

Ол курдук, 1 Хомустаах библиотеката biblioxom_16 инстаграм страницатыгар “Эҥсиэли” хаһыат историятыттан” диэн тургутук ыйытыытыгар I миэстэни Д.Ф. Алексеев аатынан орто оскуола директора У.П. Атласова, II миэстэни “Улыбка” уһуйаан үлэһитэ М.П. Сивцева-Сысолятина, III миэстэни биһиги тапталлаах общественнай корреспондеммыт, спортивнай суруналыыс, поэт А.М. Софронов-Онтуон ылбыттар.  Намнааҕы оҕо библиотеката detskaya.biblioteka.nam  “Эҥсиэли” хаһыат уонна мин дьиэ кэргэним” диэн хаартыска күрэҕин ыытта. Манна кыайыылааҕынан Нам сэлиэнньэтин олохтооҕо П.Н. Никифорова   оҕолорун  уонна сиэннэрин кытта ааттаннылар уонна редакцияттан махтал сурук, бэлэх туттулар.   Бөтүҥ библиотеката biblioteka_betyn “Эҥсиэли” хаһыаты төһө билэҕин?” диэн викторина ыыппытыгар, ыйытыыларга сөптөөх эппиэти С.Е. Дьяконова биэрэн, биһиги редакциябыт аатыттан эҕэрдэ сурук уонна өйдөбүнньүк бэлэх туттарылынна. А. Шестаков аатынан культура дьиэтэ Shestakov.club тэттик викторина ыыппытыгар, Хатыҥ Арыыттан общественнай корреспондеммыт Н.Д. Сивцева-Намыына кыайыылаах аатын ылан, редакция анал бирииһинэн наҕараадаланна. Маны тэҥэ культура дьиэтэ “Эҥсиэли” хаһыат – бэҕэһээ, бүгүн, сарсын” диэн челлендж тэрийэн ыытта.    

Түбэ модельнай библиотеката Tubya_bibl “Эҥсиэлини” төһө билэҕин?” онлайн-викторинатыгар Модут нэһилиэгин олохтооҕо С.Н. Охлопкова кыайан, грамотанан уонна харчынан бириэмийэлэммит. Көбөкөн олохтоох библиотеката bibliokebeken “Эҥсиэли” хаһыат тула” онлайн-викторинатыгар В.Х. Пестерева кыайыылаах аатын ылбыт. 

Түмүктээн эттэххэ,  1988-1995 сылларга “Эҥсиэли” хаһыат редакторынан үлэлээбит журналист, поэт, “Отуу уота” литературнай түмсүүнү төрүттээччи Н.М. Рыкунов  аата 1996 сыллаахха улуустааҕы библиотекаҕа иҥэриллибитэ. Бу сыллар тухары библиотека коллектива Николай Михайлович сырдык аатын үрдүктүк тутан, дьоһун, олус киэҥ үлэни-хамнаһы ыытар. Аныгы кэми кытта тэҥҥэ хардыылаан, интернет площадкалары баһылаан, ааҕааччыларын кытта ыкса сибээстээхтик үлэлии олороллорун, ити ыыппыт кэтэхтэн конкурстара, викториналара туоһулууллар.

Күндү доҕотторбут, улуустааҕы кииннэммит библиотека ситимин бары үлэһиттэрэ!  “Эҥсиэли”  хаһыат 85 сылыгар анаммыт тэрээһиннэри көхтөөхтүк тэрийэн ыыппыккытыгар бука барыгытыгар махталбытын биллэрэбит! Үлэҕитигэр үрдүк ситиһиилэри, бэриниилээх, эрэллээх ааҕааччылары баҕарабыт. Кинигэни таптааччы уостубатын, сыллата эбиллэ турдун!

Лена НОГОВИЦЫНА

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять