19.07.2024

Нам улууһа “Бараховскай дьыктааҥҥа” кытынна

 

Быйыл олунньу 12 күнүгэр саха уһулуччулаах государственнай уонна политическай салайааччыта, талааннаах учуонайа уонна экономиһа, киэн туттар биир дойдулаахпыт Максим Кирович Аммосов чугас доҕоро  Исидор Никифорович Барахов төрөөбүтэ 125 сылын туолла. Республика үрдүнэн бу бэлиэ даатаҕа үгүс тэрээһиннэр ыытылла тураллар.

         Ол курдук, олунньу 13 күнүгэр И.Н. Барахов аатынан республикатааҕы Государственность музейа,  Үөһээ Бүлүү кииннэммит библиотечнай ситим уонна Харбалаах модельнай библиотекатын көҕүлээһиннэринэн республикатааҕы биир кэлим «Бараховскай дьыктаан» ыытылынна.

         Бу аахсыйаҕа Нам улууһа туора турбакка көхтөөхтүк кытынна. Улуус 14 нэһилиэгэр олохтоох библиотекалар сэбиэдиссэйдэрэ тэрийиилэринэн «Бараховскай дьыктааҥҥа» уопсайа 238 киһи 25 ыйытыкка билиилэрин тургуттулар. Ордук элбэх киһи ыраах Салбан нэһилиэгэр, 1Хомустаахха, Хатырыкка кытынна. Үгүс эдэр ыччат кыттыбыта биһирэннэ. Намнааҕы профлицей студеннара, 10-11 кылаас үөрэнээччилэрэ аахсыйаҕа кыттыстылар.

Н.М.Рыкунов аатынан улуустааҕы киин библиотекаҕа дьоһун суолталаах тэрээһиҥҥэ «Нам улууһа” муниципальнай тэриллии баһылыгын солбуйааччы Петр Абрамов, улуус депутаттарын Сэбиэтин бэрэссэдээтэлэ Алексей Винокуров кыттыыны ыллылар. Библиотека директора Майя Софронова Исидор Барахов республика сайдыытыгар киллэрбит сүдү кылаатын  туһунан сырдатта.

Дьыктааҥҥа И.Н.Барахов олоҕун, үлэтин туһунан ордук үчүгэй билиилээхтэрин Хатырыктан Е.И.Охлопкова, Лейла Ермолаева (10 кыл), О.В.Дьяконова(Никольскай), Е.М.Охлопкова(1Хомустаах), С.Г.Дьяконова (Аппааны), А.П.Дьяконова, О.С.Куприянова (Түбэ), Г.В. Новгородова (Салбан), О.Н.Соловьева, А.Е.Колесова, Л.Е. Бугаева (Арбын) В.Н.Макитова (Фрунзе), Н.А.Копырина (2Хомустаах), Ярослав Колодезников (НПЛ) көрдөрдүлэр.

Бу күн аахсыйаҕа кыттыбыт дьон Исидор Барахов олоҕун, үлэтин-хамнаһын туһунан билиилэрин хаҥаттылар, Үөһээ Бүлүү Харбалаах нэһилиэгин библиотеката бэлэмнээбит электроннай презентациятын көрдүлэр,  библиотекалар фондаларыгар баар кинигэлэри билистилэр. 

Р.Гоголева

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять