Автор: Киһиэхэ биирдэ анаммыт олоҕу сиэрдээхтик, чиэстээхтик уонна бэйэтин кэнниттэн суол-иис хаалларар гына олорон, салайтаран күн бүгүн кэнчээри ыччат дьоммутугар дьоһун нэһилиэстибэ хаалларбыт үтүө дьоммут Нам улууһугар үгүстэр. 2025 сыл ахсынньы 6 күнүгэр Саха Өрөспүүбүлүкэтин тыатын хаһаайыстыбатын үтүөлээх үлэһитэ, Российскай Федерация үтүөлээх экономиһа, Нам улууһун Бочуоттаах киһитэ Терентий Иванович Замятин төрөөбүтэ 100 сылын туолла.
Бу дьоһун үбүлүөйдээх сылга Терентий Иванович сырдык аатын үйэтитэр сыаллаах киэҥ, дириҥ ис хоһоонноох тэрээһиннэри Нам улууһун библиотекатын ситимэ тэрийэн ыытта.
Киин библиотека сайтыгар электроннай ресурса салаата «Эҥсиэли кэрэһитэ» 100 ыстатыйалаах электроннай альманаҕы оҥорон таһаарда. Альманахха сүрүннээн Нам улууһун историята, үлэһит чулуу дьон олохторун, үлэлэрин туһунан Терентий Иванович ыстатыйалара уонна кини туһунан дьон сырдык өйдөбүллэрэ, ахтыылара киирдилэр.
Маны таһынан сайтка Т.Замятин кинигэлэрэ электроннай варианнара оҥоһуллан ааҕааччылар тэйиччиттэн олорон ааҕар, билсэр кыахтаннылар. Библиотека социальнай ситимигэр (RUTUBE) Терентий Иванович олоҕун кэпсиир видеоматырыйааллар саҥардыллан киирдилэр. Үгүс үлэ салаа специалистарынан Т.Замятин тэрээһиннэрин брендбугун, ыҥырыы суруктары, буклеты уо.д.а матырыйааллары оҥорууга ыытылынна.
Улуус оскуолаларыгар Н.Рыкунов аатынан киин библиотека кыраайы үөрэтэр салаа библиотекара Раиса Дьяконова уонна библиограф Раиса Гоголева бэлэмнээбит “Үйэлээх олох кэрэһитэ” диэн медиауроктар ыытылыннылар.
Ахсынньы 4 күнүгэр «Саха» НКИХ «Олох үөһүгэр» биэриигэ биир дойдулаахтарбыт кыттыыны ыллылар. Биэрии кыттыылаахтара Терентий Замятин олоҕун, айар үлэтин туһунан ахтан-санаан, сиһилии сырдаттылар, кэпсээтилэр. Бу биэриигэ кыраайы үөрэтэр салаа библиотекара Раиса Дьяконова Терентий Иванович кинигэлэрин билиһиннэрдэ.
Ахсынньы 5-6 күннэригэр үөрэнээччилэргэ, улахан дьоҥҥо IV Замятинскай ааҕыылар ситиһиилээхтик буолан аастылар. Ааҕыылары улуус үөрэҕин салаата, Н.М.Рыкунов аатынан киин библиотека, Сивцев П.И. аатынан этнография уонна история түмэлэ тэрийэн ыыттылар.
Терентий Иванович төрөөбүт күнүгэр «Хочом дьонугар аныыбын» общественность үөрүүлээх тэрээһинэ Максим Аммосов аатынан культура уонна духуобунай сайдыы дыбарыаһыгар ыччат дьону, улуус олохтоохторун муста. Дьоро күҥҥэ истиҥ эҕэрдэлэрин, ыллык санааларын тиэртилэр СӨ Государственнай мунньаҕын (Ил Түмэн) бэрэссэдээтэлэ Алексей Еремеев, СӨ культураҕа уонна духуобунай сайдыыга миниистирэ Афанасий Ноев, улуус баһылыга Юрий Слепцов, РФ Государственнай статистикатын солбуйааччы Марта Керемясова.
Тэрээһиҥҥэ «Үйэлээх олох кэрэһитэ» диэн сырдык санаалаах киһи туһунан дьоҥҥо-сэргэҕэ кэпсиир кинигэ быыстапката туруоруллан дьон-сэргэ болҕомтотун тарта. Быыстапкаҕа Терентий Иванович чахчылаах сыыппараларынан суруйбут кинигэлэрэ, матырыйааллара, кини туһунан ыстатыйалар турдулар.
Нам улууһун биир бастыҥ Саарын киһитэ – төрөөбүт дойдутун туһугар үлэлээн-хамсаан, олорон ааспыт кыраайы үөрэтээччи Терентий Иванович Замятин олорбут олоҕо, таһаарыылаах үлэтэ төрөөбүт дойдутугар, улууһугар бастыҥ холобур буолан кэлэр кэнчээри ыччакка салҕанан бара туруо диэн эрэнэбит.
Наталья Павлова,
Нам улууһун библиотекаларын кииннэммит тиһиктэрин методическай салаатын сэбиэдиссэйэ
