Автор: 
Муус устар 22 күнүгэр Н.М.Рыкунов аатынан киин библиотекаҕа Россия үтүөлээх учуутала, РСФСР үөрэҕириитин туйгуна, Россия Суруналыыстарын сойууһун чилиэнэ, Нам улууһун Ытык киһитэ, педагог, салайааччы, суруналыыс, биэс кинигэ ааптара Тихонова Зинаида Алексеевна төрөөбүтэ 85 сылыгар аналлаах “Айар-тутар кыымы күөдьүппүт суруналыыс” диэн ахтыы күнэ буолан ааста. Тэрээһиҥҥэ “Пионерскай кутаа уоттара”, “Эркээйинэн олоххо”, “Модун санаа трассатынан-айан”, “Нам улууһун үтүө-мааны дьоно” кинигэлэригэр уонна “Эҥсиэли” хаһыакка, “Далбар Хотун” сурунаалга Зинаида Алексеевна үйэтиппит үтүө-мааны дьоно-сэргэтэ, бииргэ үлэлээбит коллегалара, үөрэппит оҕолоро кыттыыны ыллылар. Дьоро күнү И.С.Гаврильев аатынан Нам 1-кы нүөмэрдээх оскуолатын «Утум» фольклорнай бөлөҕө ырыанан-тойугунан аста. Эҕэрдэ тылларын тиэртилэр Нам улууһун Үөрэҕин управлениетын специалиһа Алина Петровна Сивцева, «Түөлбэ» оҕо Киинин дириэктэрэ Надежда Гаврильевна Дьячковская, Намнааҕы киин библиотека тиһигин методиһа Наталья Васильевна Павлова. Киниэхэ уһуйуллан тахсыбыт пионербаһаатай Муза Мстиславовна Гуляева, «Эрэл» этэрээт экспедициятыгар кыттыбыт Николай Иннокентьевич Суздалов, 1986-1997 с.с. “Гелиос” фотокружогу уонна “Саһарҕа” телестудияны үлэлэппит Светлана Георгиевна Емельянова, өр сыллартан Түөлбэ оҕо киинигэр үлэлиир Ольга Ивановна Потапова, педагог-организатор Аксинья Семеновна Павлова бииргэ үлэлээбит сылларын, умнуллубат түгэннэрин кэпсээтилэр. «Нам улууһун үтүө-мааны дьоно” кинигэҕэ киирбит дьонуттан СӨ хааччыйыы эйгэтин үтүөлээх үлэһитэ Нина Николаевна Тимофеева, кытаанах санаалаах, дьикти дьарыктаах Евдокия Степановна Гаврильева-Сибэкки Евдокия, Бастакы Хомустаах нэһилиэгин “Сайдыы” оҕо айымньытын дьиэтин салайааччыта Анастасия Николаевна Винокурова, үлэни өрө туппут Намҥа биир сайдам саргылаах сайаҕас ыал ийэтэ Мария Петровна Сыромятникова уолунаан Владимир Владимировичтыын о.д.а. үтүө тылларынан ахтан-санаан ыллылар. Түбэ нэһилиэгиттэн Дария Петровна Попова оҕолоро Түөлбэ киинигэр дьарыктанан, үүнэн-сайдан тахсыбыттарын туһунан кэпсээн, Түөлбэ үлэһиттэригэр дириҥ махтал тылларын тиэртэ. Ити курдук педагог, салайааччы, суруналыыс Зинаида Алексеевна Тихоноваҕа анаммыт тэрээһиммит олус истиҥник буолан ааста.
