Аан дойдуну аймаабыт 2-с Аҕа дойду сэриитин кэмигэр фашизмы утары турууга норуот санаатын өрө көтөҕөр, сомоҕолуур айымньылар үгүстүк айыллыбыттара. Константин Симонов, Александр Твардовскай, Муса Джалиль, Михаил Светлов уо.д.а. биллиилээх фронтовик поэттар өлбөт-сүппэт хоһооннорун күн бүгүнүгэр диэри долгуйа ааҕабыт, ырыа гынан ыллыыбыт. Саха фронтовик суруйааччылара Петр Тобуруокап, Макар Хара, Тимофей Сметанин, Иннокентий Эртюков, Дьуон Дьаҥылы уо.д.а. буорах сыттаах айымньылара ол суостаах сылларга хаһыаттарга, сурунаалларга бэчээттэнэн дьон-сэргэ дууһатын кута-сүрэ буолан, уос номоҕуттан түспэт, өйүттэн-санаатыттан сүппэт ырыалар, хоһооннор буолан кутуллубуттара.
Биһиги биир дойдулаахтарбыт ортолоругар Аҕа дойду сэриитэ саҕаланыан инниттэн хоһоон-ырыа суруйан дьоҥҥо-сэргэҕэ биллэн испит талааннаах ыччат баарын ахтыылартан ааҕан билэбит. Бу матырыйаалга бэчээккэ тахсыбыт хоһооннору киллэрдибит. Баара-суоҕа биэс авторы буллубут. Баҕар дьиэтээҕи архыыпка, атын источниктарга айымньыларын суруйан хаалларбыт сэрии кыттыылаахтара бааллара буолуо. Оройуоннааҕы библиотекаҕа тиксэрэргит, билсэргит буоллар улахан махтал буолуо этэ.
Раиса Гоголева
Н.М.Рыкунов аатынан Нам киин библиотекатын библиографа.
 |
 |
 |
 |
 |