Автор: Муус устар 25 күнүгэр Нам улууһун киинигэр Н.М. Рыкунов аат. улуустааҕы библиотекаҕа Нам улууһун “Ийэ тыл” хамсааһына төрөөбүт тылы үгэһи тарҕатар, сайыннарарга үлэлэһиэн баҕалаах төрөппүттэри, дьону-сэргэни “Ийэ тыл. Саҥа сүүрээн” тэрээһиҥҥэ бииргэ түмтэ. Тэрээһиммит сыала-соруга аныгы үйэҕэ төрөппүттэргэ оҕолорун сахалыы иитиигэ көмө буолуу, үлэ уопутун, холобурдары үллэстии буолар.
Тэрээһиммитин Елена Кривошапкина арчылаан арыйбыта. Ыалдьыттары көрсүү киирэр аантан алаадьынан күндүлээһинтэн, саха киһи сиэринэн салама баайтаран кэлбит дьону туспа, сылаас, сахалыы эйгэҕэ киллэрдэ.
Күн бастакы аҥаарыгар араас хайысханы хабан оҕону сахалыы иитиигэ көмө буолар холобурдары үллэстиигэ кытыннылар: Вилюяна Никитина – өрөспүүбүлүкэтээҕи “Ийэ тыл” түмсүү салайааччытын солбуйааччыта, “Ийэ тыл кэскилэ” түмсүү салайааччыта, Гуманитарнай чинчийэр уонна аҕыйах ахсааннаах хотугу омуктар проблемаларын институтун билим үлэһитэ, эдэр ийэлэр “Күөрэгэй” түмсүүтүн салайааччыта Ирина Матвеева –блогер, урбаанньыт, Skintime компания салайааччыта уонна чилиэттэрэ Марина Спиридонова-, Ирина Жарина- Дьокуускай куорат сахалыы “Уу-чуку-чук” уһуйаан сэбиэдиссэйэ, Андрей Алтынаров- оҕо ааҕар уонна сайдар киинин үлэһитэ. Өрөспүүбүлүкэтээҕи лиссиэй-интернаттан Нарыйаана Докторова салайааччылаах “Күн” оҕо түмсүүтэ кэлэн үлэтин-хамнаһын кэпсээн элбэх дьон сүргэтин көтөхтө диэххэ сөп.
Наммыт улууһуттан отоһут, филолог, эт-сиин ритмическай сайдыытын “Отуор” концепция ааптара , элбэх оҕолоох ийэ Елена Келина уонтан тахса сыл Нам улууһун Таастааҕын эмтээх отунан чэй оҥорорун үллэһиннэ, ыалдьыттарга амсатта. Нам улууһун оҕо библиотекатын сэбиэдиссэйэ Варвара Бочкарева оҕону ааҕыыга сыһыарыыга “Оҕо сахалыы ааҕар киинин” үлэтин билиһиннэрдэ.
Ону тэҥэ ыраах атын дойдуга төрөөбүт тылларын умнубакка оҕолорун сахалыы саҥардарга кыһаллар, төрүт үгэстэрин тарҕата олорор биир дойдулаахтарбыт ыыппыт видеороликтарын көрдөрүүнү дьон-сэргэ олус сэргээтэ.
Тэрээһиммит иккис аҥаарыгар –оҕолорго аналлаах түһүлгэ тэрилиннэ. “Күөрэгэй” түмсүү бэрт сонун сахалыы квиз күрэҕин оонньотон оҕолору түмтэ, сэргэхситтэ. Нам нэһилиэгин 4 оскуолатыттан кэлэн алта хамаанданан араас саастаах оҕо кытынна, түмүгэр кыайыылаахтар минньигэс бирииһинэн, Нам кафетыгар сертификатынан наҕараадаланан оҕолор олус астынан тарҕастылар. Оҕолор түһүлгэлэригэр биир сүрүн ыалдьыппытынан “Мэхээлэчээн булчут” киинэҕэ сүрүн оруолу толорбут, биир дойдулаахпыт эдэр артыыспыт Дамир Дьяконов буолбута. Кини оҕолорго киинэҕэ хайдах кастинг ааһан уһуллубутун, өйдөөн хаалбыт түгэннэрин кэпсээн оҕолорго сахалыы киинэ эйгэтин билиһиннэрбитэ олус интэриэһинэй буолбута.
Ол курдук биһиэхэ күүс-көмө буолбут спонсордарбытыгар “Нам-Авто” маҕаһыын, “Профи-Строй” тутуу компаниятын генеральнай директорыгар Евгений Эверстовка, “Алина текстиль” маҕаһыын хаһаайкатыгар Алина Винокуроваҕа, “Урсун” рекламно-производственнай студия салайааччытыгар Дьулустан Лебедевка, Маймаҕа нэһилиэгин урбаанньытыгар Татьяна Слепцоваҕа, “Рамен-опт” маҕаһыын хаһаайкатыгар Туйаара Петуховаҕа, “Фудмания” уонна “Фудстоп” кафе хаһаайкатыгар Лена Дмитриеваҕа.
Өрөспүүбүлүкэтээҕи “Ийэ тыл” көҥүл түмсүү ааспыт үйэ 90-с сылларыттан үлэлиир. 2022 сылтан хат сөргүтүллэн, үлэтин саҕалаабыта. Бэрэссэдээтэлинэн Наталья Михалева-Сайа талыллан үлэлии сылдьар. Түмсүү салаалара улуустарга тэриллэн, хамсааһын баран эрэр. Ол курдук Наммыт улууһугар “Ийэ тыл” түмсүү 2023 сыллаахтан тэриллэн ийэ тылыгар, төрүт үгэһин туһугар долгуйар, үлэлэһиэн баҕалаах дьону бэйэлэригэр түмэн үлэтин саҕалаабыта. Инникитин маннык тэрээһиннэри силигин быспакка сыллата ыытылларын былааннаатыбыт, түмсүүбүт өссө күүскэ үлэлииригэр күүс-уох эбилиннэ.
Ыччакка, оҕолорбутугар ийэ тылы иҥэрии биһиги, төрөппүттэр эбээһинэспит буоларын өйдүөх, өйдөтүөх тустаахпыт!
